پٹرولیم قیمتیں امریکی تاریخ کی بلند ترین سطح پر،اشیائے خورونوش اور روزمرہ اشیاء بھی مہنگی

واشنگٹن:امریکی تاریخ میں لیبر ڈے پر ایندھن کی قیمتیں بلند ترین سطح پر، ایران جنگ اور ریفائنری مسائل بحران کا سبب بن گئے
امریکا میں موسمِ گرما کے آخری تعطیلاتی ہفتے یعنی امریکی "لیبر ڈے” کے موقع پر گیس کی قیمتیں ملکی تاریخ کی بلند ترین سطح پر پہنچ گئی ہیں، جہاں فی گیلن اوسط قیمت 4.14 ڈالر ریکارڈ کی گئی ہے۔ اے اے اے (AAA) موٹر کلب کے مطابق قیمتوں کی یہ سطح گزشتہ سال کے مقابلے میں تقریباً ایک ڈالر زیادہ ہے، جبکہ اس سے قبل 2012 کا ریکارڈ 3.82 ڈالر فی گیلن تھا۔
فروری میں امریکا اور اسرائیل کی جانب سے ایران پر حملے کے بعد سے خام تیل کی ترسیل شدید متاثر ہوئی ہے اور آبنائے ہرمز سے تیل کی نقل و حرکت میں نمایاں کمی آئی ہے، جس نے عالمی سطح پر توانائی کا بحران پیدا کر دیا ہے۔ اس کے علاوہ ڈیزل کی قیمتیں بھی تاریخ کی بلند ترین سطح یعنی 5.85 ڈالر فی گیلن تک پہنچ گئی ہیں، جس سے ٹرانسپورٹ کے اخراجات بڑھنے کے باعث اشیائے خوردونوس اور روزمرہ کی دیگر اشیاء بھی مہنگی ہو گئی ہیں۔
ماہرین کا کہنا ہے کہ مشرق وسطیٰ کی کشیدہ صورتحال کے علاوہ امریکا میں شدید گرمی کے باعث ریفائنریز پر دباؤ اور یوکرین کے حملوں کی وجہ سے روسی ریفائنریز کی پیداوار میں کمی بھی اس بحران کی بڑی وجوہات ہیں۔ امریکی وزیرِ توانائی کرس رائٹ نے تسلیم کیا ہے کہ قیمتیں بلند ہیں تاہم حکومت مارکیٹ میں بہتری لانے کے لیے اقدامات کر رہی ہے، جبکہ مارکیٹ کے تخمینوں کے مطابق آنے والے مہینوں میں قیمتوں میں کمی کا امکان ہے۔