ویتنام:ویتنام کے ساحلی شہر نہاترانگ میں منعقدہ عالمی مقابلہ حسن "مس ورلڈ” کے 73 ویں ایڈیشن کے فائنل میں جمہوریہ ڈومینیکن کی جوہیری مولا ڈومنگیز (Joheirry Mola Dominguez) نے دنیا بھر سے آئے 111 حریفوں کو پچھاڑ کر سال 2026 کا مس ورلڈ کا تاج اپنے سر پر سجا لیا۔
اس سالانہ تقریب میں مقابلے کے آغاز کے 75 سال مکمل ہونے کا جشن بھی منایا گیا۔مقابلے کے آخری اور انتہائی سنسنی خیز مرحلے میں دنیا بھر سے چھ فائنلسٹ خواتین کے درمیان مقابلہ تھا۔ اسپین کی الیزابتھ رینیس الا برن (Elisabeth Reynés) نے پہلی رنر اپ جبکہ ملائیشیا کی تانوسیا چیٹی (Taanusiya Chetty) نے دوسری رنر اپ کا اعزاز حاصل کیا۔ میزبان ملک ویتنام کی نمائندہ لے نگوئن باؤ نگاک (Lê Nguyễn Bảo Ngọc) بھی ٹاپ 6 کے فائنل مرحلے میں جگہ بنانے میں کامیاب رہیں۔ نئی ملکہ کو یہ تاج مس ورلڈ 2025 تھائی لینڈ کی اوپال سچاتا چوانگ سری نے پہنایا۔
ڈومینیکن کے لیے یہ فتح اس لحاظ سے بھی تاریخی ہے کہ ملک نے دوسری بار یہ عالمی اعزاز اپنے نام کیا ہے۔ اس باوقار مقابلے میں عرب دنیا کی نمایاں حسیناؤں بشمول مس لبنان برلا حرب، مس مراکش شریہان شرقی اور مس صومالیہ فوزیہ عبداللہ گراد نے بھی بھرپور شرکت کی۔رواں سال کے اس ایڈیشن کی خاص بات "خوبصورتی مقصد کے ساتھ” (Beauty with a Purpose) کے اصول پر سختی سے عمل درآمد تھا۔ فائنل تک رسائی کا سفر ٹاپ 40 سے شروع ہو کر بالترتیب ٹاپ 20، ٹاپ 12 اور پھر آخری مرحلے میں ٹاپ 6 تک پہنچا۔ فیشن شوز، ثقافتی تقریبات اور نیلے تاج کی دلکش چمک کے ساتھ یہ شاندار عالمی مقابلہ اپنے اختتام کو پہنچا۔
جمہوریہ ڈومینیکن کی جوہیری مولا ڈومنگیز نے مس ورلڈ 2026 کا تاج اپنے نام کر لیا
