کولکتہ / رام پورہاٹ:مغربی بنگال کی کی سابق وزیر اعلیٰ اور ترنمول کانگریس کی سربراہ ممتا بنرجی کی بھتیجی برشٹی مکھرجی بیربھوم ضلع کے رام پورہاٹ میں اپنے گھر کے اندر پراسرار طور پر مردہ حالت میں پائی گئیں۔ پولیس نے ابتدائی طور پر اس واقعے کو خودکشی قرار دیا ہے، تاہم موت کی اصل وجوہات کا حتمی تعین پوسٹ مارٹم رپورٹ آنے کے بعد ہی ہو سکے گا۔
پولیس ذرائع کے مطابق برشٹی مکھرجی کی لاش کسمبا گاؤں میں ان کے رہائشی مکان کی دوسری منزل کے ایک کمرے سے پھندے سے لٹکی ہوئی برآمد ہوئی۔
متوفی برشٹی مکھرجی، ممتا بنرجی کے چچا زاد بھائی اور ترنمول کانگریس کے مقامی رہنما نہار مکھرجی کی صاحبزادی تھیں۔ واقعے کے حوالے سے غم زدہ والد نہار مکھرجی نے پولیس کو بتایا کہ ان کی بیٹی گزشتہ پانچ سے چھ برس سے شدید ذہنی دباؤ اور صحت کے مسائل سے دوچار تھی، اور وہ باقاعدگی سے ڈاکٹروں سے اپنا علاج کرا رہی تھی۔ علاوہ ازیں، مقامی ذرائع اور پولیس تفتیش میں یہ بات بھی سامنے آئی ہے کہ برشٹی کی ازدواجی زندگی بھی تنازعات کا شکار تھی اور گزشتہ چند ماہ سے ان کا اپنے شوہر کے ساتھ طلاق کا معاملہ عدالت میں چل رہا تھا، جبکہ ان کا ایک 12 سالہ بچہ بھی ہے۔
یادرہے برشٹی مکھرجی کا نام مغربی بنگال کے مبینہ اسکول بھرتی کرپشن کیس میں بھی آتا رہا تھا۔
