سیالکوٹ۔سلیم احمد اعوان شیخو
اگوکی کے علاقہ میں سابق کرایہ دار نے خاتون کو خنجر کے پے درپے وار کرکے موت کے گھاٹ اتار دیا۔بتایا گیا ہے کہ تھانہ اگوکی کے علاقہ گولو پھالہ سے کوٹلی بھٹہ کے قریب شہزاد گرل والی گلی میں ایک خاتون 38 سالہ صائمہ زوجہ محمد اسلام احمد اپنے بھائی فیصل اور بیٹے حمزہ کے ہمراہ کار پر جا رہی تھی اور کار صائمہ خود چلا رہی تھی کہ مذکورہ علاقہ میں صائمہ کے سابق کرایہ دار ذیشان گجر عرف شانی نے اپنے دو نامعلوم ساتھیوں کی مدد سے کار کو روک لیا تو ذیشان اور اس کے ساتھیوں نے صائمہ کے بھائی فیصل کو کار سے نیچے اتار لیا جبکہ صائمہ کے بیٹے کو ذیشان نے پکڑا تو صائمہ نے مزاحمت کی تو صائمہ کے مزاحمت کرنے پر ذیشان نے خنجر کے ہے درپے وار کر کے صائمہ کو موت کے گھاٹ اتار دیا اور فرار ہوگئے۔معلوم ہوا ہے کہ صائمہ نے ذیشان کو جو مکان کرایہ پر دے رکھا تھا وہ مکان صائمہ نے ذیشان کی حرکات درست نہ ہونے کے باعث خالی کروا لیا تھا جس کا ذیشان کو دکھ تھا۔پولیس نے فیصل کی رپورٹ پر ذیشان اور اس کے ساتھیوں کے خلاف مقدمہ درج کرکے ان کی گرفتاری کے لئے چھاپے مارنے شروع کر دئیے ہیں۔پولیس نے لاش اپنی تحویل میں لے کر پوسٹ مارٹم کے لئے گورنمنٹ علامہ اقبال میموریل ٹیچنگ ہسپتال سیالکوٹ منتقل کر دی ہے۔یہاں یہ امر قابل ذکر ہے کہ صائمہ کی لاش کے بارے میں یہ شور مچا ہوا تھا کہ اس کی لاش ایک کار میں پڑی ہوئی ملی ہے لیکن بعد میں صائمہ کے ورثاء کے ملنے کے بعد مقدمہ جو درج ہوا ہے اس میں کہانی کچھ اور بیان کی گئی ہے۔جس سے ظاہر ہوتا ہے کہ دال میں کچھ کال ضرور ہے۔