لاہور:وزیراعلیٰ پنجاب مریم نواز شریف سے ڈیرہ غازی خان سے تعلق رکھنے والے اراکینِ اسمبلی نے ملاقات کی، جس میں خطے کی سیاسی صورتحال، امن و امان اور عوامی فلاح و بہبود کے امور پر تفصیلی تبادلہ خیال کیا گیا۔ ملاقات کے دوران اراکینِ اسمبلی نے وزیراعلیٰ مریم نواز شریف کے حالیہ کامیاب دورہِ چین کو سراہتے ہوئے انہیں زبردست الفاظ میں مبارکباد پیش کی۔
وزیراعلی پنجاب مریم نوازشریف سے ڈیرہ غازی خان کے ارکان اسمبلی کی ملاقات۔ سیاسی صورتحال، امن و امان اور عوامی مسائل پر گفتگو ہوئی۔ وزیراعلی نے ترقیاتی منصوبوں کی مانیٹرنگ کی ہدایت کی۔ ارکان اسمبلی نے کامیاب دورہ چین کی مبارکباد دی اور ڈی جی خان الیکٹروبس سروس کو گیم چینجر قرار… pic.twitter.com/7JzZVebShh
— Marriyum Aurangzeb (@Marriyum_A) September 1, 2026
وفد نے ڈیرہ غازی خان میں شروع کی جانے والی جدید الیکٹروبس سروس کو خطے کے لیے ایک "گیم چینجر” قرار دیتے ہوئے وزیراعلیٰ کی عوامی دوست سوچ کو خراجِ تحسین پیش کیا۔ اراکین نے کہا کہ اس پبلک ٹرانسپورٹ پروجیکٹ سے جنوبی پنجاب کے عوام کو سفری سہولیات کی فراہمی میں ایک نیا انقلاب آئے گا۔
وزیراعلیٰ مریم نواز شریف نے اراکینِ اسمبلی سے گفتگو کرتے ہوئے ہدایت کی کہ ڈیرہ غازی خان میں جاری تمام ترقیاتی منصوبوں کی رفتار کو تیز کیا جائے اور ان کی مانیٹرنگ کے عمل کو خود اراکین اور انتظامیہ مل کر یقینی بنائیں۔ انہوں نے واضح کیا کہ ترقیاتی کاموں میں معیار اور شفافیت پر کسی قسم کا سمجھوتہ نہیں کیا جائے گا اور پبلک فنڈز کا ایک ایک روپیہ عوام کی فلاح پر خرچ ہوگا۔
ملاقات میں امن و امان کی صورتحال کا جائزہ لیتے ہوئے ضلعی انتظامیہ کو ہدایت کی گئی کہ عوام کے جان و مال کے تحفظ کو ہر صورت یقینی بنایا جائے اور جرائم پیشہ عناصر کے خلاف بلاامتیاز کارروائیاں جاری رکھی جائیں۔