خوشاب (راجہ نورالہی عاطف سے)
ڈپٹی انسپکٹر جنرل، ہیڈ آف ٹریفک پنجاب لاہور وقاص نذیر اور ڈسٹرکٹ پولیس آفیسر خوشاب ڈاکٹر عمارہ شیرازی کی خصوصی ہدایات پر ڈسٹرکٹ ٹریفک آفیسر خوشاب سید قمر اقبال حیدر نے چیف ایگزیکٹو آفیسر، ڈسٹرکٹ ایجوکیشن اتھارٹی خوشاب محمد عیسیٰ لالی سے ملاقات کی، جس میں طلبہ میں ٹریفک قوانین اور روڈ سیفٹی سے متعلق شعور اجاگر کرنے پر تبادلہ خیال کیا گیا۔
ملاقات کے بعد چیف ایگزیکٹو آفیسر ڈسٹرکٹ ایجوکیشن اتھارٹی خوشاب جناب محمد عیسیٰ لالی نے ضلع بھر کے سرکاری و نجی تعلیمی اداروں کے سربراہان کو بذریعہ نوٹیفکیشن طلبہ کی حفاظت کے لیے درج ذیل ہدایات جاری کر دی ہیں:
کوئی بھی کم عمر طالبعلم سکوٹی یا موٹر سائیکل ہرگز نہ چلائے،16 سے 18 سال کے طلبہ موٹر سائیکل چلانے سے قبل قانون کے مطابق ڈرائیونگ پرمٹ لازمی حاصل کریں،تمام طلبہ اور سٹاف موٹر سائیکل چلاتے وقت ہیلمٹ کا لازمی استعمال کریں،موٹر سائیکلوں کے بریکس اور انڈیکیٹرز درست حالت میں رکھے جائیں،طلبہ کو ٹریفک قوانین اور روڈ سیفٹی اور محفوظ طریقے سے سڑک عبور کرنے کے حوالے سے باقاعدگی سے آگاہی فراہم کی جائے۔
ڈسٹرکٹ ٹریفک پولیس خوشاب کے مطابق ڈسٹرکٹ ایجوکیشن اتھارٹی کے تعاون سے ضلع بھر کے تعلیمی اداروں میں روڈ سیفٹی آگاہی مہم کو مزید مؤثر بنایا جائے گا تاکہ نوجوان نسل کو ذمہ دار شہری اور محفوظ ڈرائیور بنایا جا سکے۔