قصور (محمد وقاص اشرف)
فیڈرل انویسٹی گیشن ایجنسی فیڈرل انویسٹی گیشن ایجنسی نے مبینہ کرپشن، ٹاؤٹ مافیا کی سرگرمیوں اور شہریوں سے غیر قانونی رقوم وصول کرنے کی شکایات پر پاسپورٹ آفس قصور میں کارروائی کرتے ہوئے متعدد ملازمین اور دیگر افراد کو حراست میں لے لیا۔ذرائع کے مطابق فیڈرل انویسٹی گیشن ایجنسی کے سب انسپکٹر راؤ شفیق نے ٹیم کے ہمراہ پاسپورٹ آفس قصور میں اچانک چھاپہ مارا۔ کارروائی کے دوران اسسٹنٹ ڈائریکٹر محمد وقاص، ڈیٹا انٹری آپریٹر محمد الیاس، شہزاد اسلم، سکیورٹی گارڈز کلیم، مقیم اور احمد، سویپر غلام مصطفیٰ سمیت مبینہ پرائیویٹ مین ٹاؤٹس رؤف، عرفان اور نعمان کو حراست میں لیا گیا۔ذرائع کا مزید کہنا ہے کہ پاسپورٹ آفس میں سکیورٹی ڈیوٹی پر تعینات پنجاب پولیس کے کانسٹیبل روحیل کو بھی تفتیش کے لیے حراست میں لیا گیا۔ فیڈرل انویسٹی گیشن ایجنسی ٹیم تمام زیرِ حراست افراد کو مزید تحقیقات کے لیے لاہور منتقل کر چکی ہے۔
کارروائی کے بعد پاسپورٹ آفس قصور کو سیل کر دیا گیا جبکہ ریکارڈ اور دیگر متعلقہ دستاویزات بھی تحویل میں لے لی گئی ہیں۔ ذرائع کے مطابق معاملے کی اعلیٰ سطحی انکوائری شروع کر دی گئی ہے اور مختلف پہلوؤں سے تحقیقات جاری ہیں۔
FIA حکام کی جانب سے تاحال کوئی باضابطہ اعلامیہ جاری نہیں کیا گیا، تاہم ذرائع کا کہنا ہے کہ کارروائی شہریوں کی جانب سے موصول ہونے والی متعدد شکایات اور ابتدائی شواہد کی روشنی میں عمل میں لائی گئی۔ تحقیقات مکمل ہونے کے بعد مزید حقائق سامنے آنے اور قانونی کارروائی کا دائرہ وسیع ہونے کا امکان ہے۔