برفانی تودہ سرکنے اور چٹانیں گرنے سے سیلاب آیا، انتظامیہ نے ریڈ الرٹ جاری کرتے ہوئے تلاش کی کارروائیاں شروع
کھٹمنڈو:بدھ کی صبح نیپال میں آنے والے ایک شدید اور اچانک سیلاب نے تباہی مچا دی ہے، جس کے نتیجے میں 105 بھارتی شہریوں سمیت مجموعی طور پر 384سیاح لاپتہ ہو گئے ہیں جبکہ اب تک کم از کم 8 افراد کے ہلاک ہونے کی تصدیق کی جا چکی ہے۔
حکام کا کہنا ہے کہ غیر ملکی لاپتہ سیاحوں میں بھارتی شہریوں کے علاوہ برطانیہ، آسٹریلیا، امریکہ، ملائیشیا، جنوبی افریقہ اور نیدرلینڈز کے باشندے بھی شامل ہیں، جبکہ کئی افراد کی قومیت کے بارے میں تحققات جاری ہیں۔
یہ تمام لاپتہ سیاح ۹ مختلف ٹریول ایجنسیوں سے وابستہ تھے۔
حکام کے مطابق یہ ہولناک سیلاب بھوٹے کوشی دریا (Bhote Koshi River) میں اچانک پانی کی سطح خطرناک حد تک بلند ہونے کے باعث آیا، جس نے رسوا، دھادنگ اور نواکوٹ کے اضلاع کو اپنی لپیٹ میں لے لیا۔ صبح تقریباً ۹ بجے آنے والے اس سیلابی ریلے کی وجہ سے کئی دیہات، زمینی راستے اور اہم ہائیڈرو پاور منصوبے شدید نقصان کا شکار ہوئے ہیں۔
انتظامیہ نے ہنگامی صورتحال کے پیش نظر بھوٹے کوشی، تریشولی اور ناراینی دریاؤں کے گردونواح میں رہنے والے تمام شہریوں اور سیاحوں کو سختی سے ہدایت کی ہے کہ وہ پانی کے کناروں سے دور رہیں اور محفوظ مقامات پر منتقل ہو جائیں