سیالکوٹ۔سلیم احمد اعوان شیخو ۔
پولیس کی جانب سے عید میلاد النبی ﷺ کے پُرامن انعقاد اور شہریوں کے تحفظ کو یقینی بنانے کے لئے ضلع بھر میں فلیگ مارچ کا انعقاد کیا گیا۔
فلیگ مارچ ڈسٹرکٹ پولیس لائن سیالکوٹ سے شروع ہو کر مقررہ روٹس پر شہر کی مختلف شاہراہوں سے ہوتا ہوا واپس پولیس لائن پہنچا۔مارچ میں ضلع پولیس، ایلیٹ فورس، ٹریفک اور دیگر دستوں نے شرکت کی۔ سمبڑیال، پسرور اور ڈسکہ سرکلز میں بھی متعلقہ ایس ڈی پی اوز کے دفاتر سے فلیگ مارچ کا انعقاد کیا گیا۔
فلیگ مارچ کا مقصد شہریوں کو محفوظ ماحول کی فراہمی، پولیس کی تیاری اور امن و امان برقرار رکھنے کے عزم کا اظہار اور شر پسند عناصر کی حوصلہ شکنی ہے۔ڈسٹرکٹ پولیس آفیسر
سیالکوٹ کیپٹن (ر) دوست محمد کی ہدایت پر عید میلاد النبی ﷺ کے موقع پر ضلع بھر میں فول پروف سیکورٹی انتظامات کیے گئے ہیں۔ جلوسوں اور محافل کی سیکورٹی کے لئے پولیس نفری تعینات جبکہ اہم مقامات کی نگرانی جدید ٹیکنالوجی کے ذریعے یقینی بنائی جا رہی ہے۔
سیالکوٹ پولیس امن و امان کے قیام اور شہریوں کے جان و مال کے تحفظ کے لئے مکمل طور پر الرٹ ہے۔