امریکی پابندیوں سے پہلے ایران کے صوبہ فارس میں گیس کے عظیم ذخائر دریافت

ساڈھے سات ٹریلین مکعب فٹ سے زائد گیس دریافت،توقع ہے کہ اس فیلڈ سے تقریباً 5,700 ارب مکعب فٹ گیس نکالی جا سکے گی

تہران:ایران نے اہم پیشرفت کا اعلان کرتے ہوئے بتایا ہے کہ اس نے جنوبی صوبے فارس (Fars Province) میں واقع ایک فیلڈ سے 7.5 ٹریلین مکعب فٹ (یعنی 212.4 ارب مکعب میٹر) سے زائد قدرتی گیس کے نئے ذخائر دریافت کر لیے ہیں۔
ایرانی وزیرِ تیل محسن پاک نژاد کا سرکاری میڈیا سے گفتگو کرتے ہوئے کہنا تھا کہ تخمینہ شدہ ریکوری کے تناسب کو دیکھا جائے تو اس فیلڈ سے تقریباً 5,700 ارب مکعب فٹ گیس باآسانی نکالی جا سکتی ہے۔
ڈیلی صباح کے مطابق وزیرِ تیل نے اس بات پر بھی روشنی ڈالی کہ یہ دریافت ہونے والی گیس ’سویٹ‘ (خالص) نوعیت کی ہے، جس کا سب سے بڑا فائدہ یہ ہوگا کہ اس کی مائننگ، ڈویلپمنٹ اور آپریشنز پر آنے والے اخراجات میں خاصی کمی واقع ہوگی۔
یہ نئی دریافت ایسے وقت میں سامنے آئی ہے جب ایران کو امریکا اور اسرائیل کے ساتھ ماضی میں ہونے والی کشیدگی اور جنگ کی وجہ سے اپنے توانائی کے بنیادی ڈھانچے کو پہنچنے والے نقصانات کی مرمت کے چیلنجز کا سامنا ہے۔ جنگ کے آغاز کے بعد فضائی و زمینی حملوں کی وجہ سے گیس کی پیداوار میں روزانہ کی بنیاد پر لگ بھگ 230 ملین مکعب میٹر (mcm) کی کمی واقع ہوئی تھی، تاہم حکام کا کہنا ہے کہ ملک اپنی پیداواری صلاحیت کو بحال کرنے کے لیے تیزی سے کام کر رہا ہے۔
اس وقت نئی امریکی پابندیوں کے خطرات کے باوجود، گیس کے ان نئے اور قیمتی ذخائر کی دریافت ایران کے توانائی کے شعبے اور دباؤ کا شکار معیشت کے لیے ایک بہت بڑی اور حوصلہ افزا خبر مانی جا رہی ہے۔