نوابشاہ (رپورٹ: نفیس آرائیں)
مہراں ہائی وے پر عباسی واٹر کے قریب تیز رفتار ٹرک نے لوڈر رکشا کو کچل دیا، جس کے نتیجے میں رکشا میں سوار دو مزدور دب کر جاں بحق ہوگئے۔
ذرائع کے مطابق تیز رفتار ٹرک نے لوڈر رکشا کو اپنی زد میں لے لیا، جس کے باعث دو محنت کش موقع پر ہی جاں بحق ہوگئے۔ حادثے کے بعد علاقے میں سوگ کی فضا پھیل گئی۔
مقامی رہائشیوں کا کہنا ہے کہ مہراں ہائی وے پر بڑے ٹرکوں اور دیگر بھاری گاڑیوں کی تیز رفتاری کے باعث آئے روز حادثات پیش آ رہے ہیں، جن میں متعدد افراد اپنی جانوں سے ہاتھ دھو بیٹھے ہیں۔
دو روز قبل دوڑ شہر میں شیعہ علماء کونسل کی جانب سے احتجاجی دھرنا دے کر بھاری گاڑیوں کی آمدورفت روکنے کا مطالبہ بھی کیا گیا تھا، تاہم مقامی افراد کے مطابق اس مطالبے پر تاحال کوئی مؤثر کارروائی نہیں کی گئی۔
رہائشیوں نے اعلیٰ حکام سے مطالبہ کیا ہے کہ مہراں ہائی وے پر بھاری گاڑیوں کی تیز رفتاری اور بے قابو آمدورفت کا فوری نوٹس لیا جائے، حادثے کے ذمہ داروں کے خلاف کارروائی کی جائے اور متعلقہ انتظامیہ کی غفلت کا بھی تعین کیا جائے، تاکہ مزید قیمتی انسانی جانوں کا ضیاع روکا جا سکے۔