مٹیاری رپورٹ عامر علی انڑ
مٹیاری کی تعصیل ہالا ریلوے اسٹیشن کالونی کے رہائشی سولنگی برادری کے مردوں اور خواتین نے دوڑ پولیس اور جام صاحب کی ڈاہری برادری کی مبینہ زیادتیوں کے خلاف ہالا پریس کلب کے سامنے احتجاجی مظاہرہ کیا۔مظاہرین عزیز اللہ، ڈاڑھوں، محمد علی، عبدالسلام، مسمات سلیمت خاتون اور شبانہ سولنگی کی قیادت میں احتجاج کرتے ہوئے الزام عائد کیا کہ دو روز قبل دوڑ پولیس نے بلاجواز صدام سولنگی کو ہالا کے ایک ہوٹل سے اٹھا کر دوڑ تھانے میں مبینہ طور پر ڈکیتی کے جھوٹے مقدمے میں گرفتار کرلیا۔مظاہرین کے مطابق صدام سولنگی کو چھڑانے کے لیے جانے والے رشتہ دار شاہد سولنگی کے خلاف بھی بااثر ڈاہری برادری کے مبینہ کہنے پر چرس کا مقدمہ درج کرکے اسے لاک اپ کردیا گیا، جبکہ احتجاج کرنے والی خواتین کو بھی دوڑ پولیس نے تھانے سے نکال دیا۔مظاہرین نے مزید الزام عائد کیا کہ گزشتہ روز حیدرآباد عدالت سے واپسی کے دوران سفید پوش مسلح افراد صدام سولنگی کی اہلیہ صنم گل کو مبینہ طور پر اغوا کرکے لے گئے۔ مظاہرین نے الزام لگایا کہ اغوا میں اس کے رشتہ دار غلام حسین، شان، ایڈووکیٹ سکندر، شمس ڈاہری اور دیگر نامعلوم افراد ملوث ہیں۔مظاہرین نے خدشہ ظاہر کیا کہ صنم گل کو اس کے رشتہ دار مبینہ طور پر کاروکاری کے الزام میں قتل کرسکتے ہیں۔ انہوں نے اعلیٰ حکام سے مطالبہ کیا کہ واقعے کا نوٹس لے کر مبینہ جھوٹے مقدمات ختم کیے جائیں، صدام سولنگی اور شاہد سولنگی کو رہا کیا جائے اور صنم گل کو مبینہ اغوا کاروں کے چنگل سے بازیاب کرا کے تحفظ فراہم کیا جائے۔