پیرس:فرانسیسی کسٹم حکام نے پیرس کے چارلس ڈی گال ایئرپورٹ پر کارروائی کرتے ہوئے ایک مسافر کے قبضے سے 144 کلوگرام ممنوعہ نشہ آور پودا ‘قات’ (Khat) برآمد کر کے اسے گرفتار کر لیا ہے۔
میڈیا رپورٹس کے مطابق 28 سالہ سوئس مسافر تل ابیب، اسرائیل سے پرواز کے ذریعے پیرس پہنچا تھا، جس نے اس بھاری مقدار کو اپنے سات الگ الگ سوٹ کیسز میں مہارت سے چھپا رکھا تھا۔ بوبگنی کریکشنل کورٹ میں فاسٹ ٹریک ٹرائل کے بعد عدالت نے ملزم کو 10 ماہ قید اور فرانسیسی سرزمین پر داخلے پر 10 سال کی پابندی کی سزا سنا دی ہے۔
‘قات’ کیا ہے ؟
‘قات’ ہارن آف افریقہ اور عرب جزیرہ نما میں پایا جانے والا ایک پھولدار پودا ہے، جس کے پتوں کو محرک خصوصیات کے لیے چبایا جاتا ہے۔ اگرچہ یہ اسرائیل سمیت چند ممالک میں قانونی حیثیت رکھتا ہے، لیکن فرانس میں اس کے جسم پر مرتب ہونے والے منفی اثرات (ایمفیٹامین جیسے اثرات) کی وجہ سے اسے ایک ممنوعہ منشیات کے قراردیا گیا ہے۔
دورانِ تفتیش، پکڑے جانے والے اسمگلر نے اعتراف کیا کہ اس نے جوئے کے اپنے پرانے قرضے چکانے کے لیے صرف 1500 یورو کے فوری معاوضے کے عوض یہ خطرہ مول لیا تھا، اور وہ گرفتار ہونے سے پہلے اس نوعیت کے پانچ اور چکر لگانے کا ارادہ رکھتا تھا۔
پیرس ایئرپورٹ پر اسمگلنگ کی بڑی کوشش ناکام، مسافر سے 144 کلو گرام منشیات برآمد
