دیر بالا (بیورو چیف ریاض ابوالخیل): اپر دیر کے ہونہار اور قابلِ فخر نوجوان ازلان شاہ نے شاندار کارکردگی کا مظاہرہ کرتے ہوئے محض دو دنوں کے اندر 2 گولڈ، 1 سلور اور 1 برونز میڈل جیت کر ملک و قوم کا سر فخر سے بلند کر دیا ہے۔ ان کی اس شاندار کامیابی پر پورے علاقے میں جشن کا سماں ہے۔
تفصیلات کے مطابق نوجوان کھلاڑی ازلان شاہ نے رواں ماہ کی 13 تاریخ کو صوبہ پنجاب کے شہر لودھراں میں منعقدہ مقابلوں میں شاندار کھیل پیش کرتے ہوئے ایک گولڈ اور ایک برونز میڈل اپنے نام کیا۔
اس کے فوراً بعد، یومِ آزادی (14 اگست) کے موقع پر اسلام آباد اسپورٹس کمپلیکس میں ہونے والے مقابلوں میں ازلان شاہ نے اپنی غیر معمولی صلاحیتوں کا لوہا منواتے ہوئے مزید 2 گولڈ اور 1 سلور میڈل جیت کر دیکھنے والوں کو دنگ کر دیا۔ جشنِ آزادی کے مبارک موقع پر پاکستان کے لیے اتنے سارے تمغے جیتنا یقیناً قوم کے لیے ایک انتہائی قابلِ فخر اور تاریخی لمحہ ہے۔
ازلان شاہ کی اس شاندار کامیابی پر اہلیانِ دیر بالا اور تمام کھیلوں کے شائقین کی طرف سے شدید خوشی کا اظہار کیا جا رہا ہے۔ شہریوں اور مقامی عمائدین نے ازلان شاہ اور ان کے اہل خانہ کو دلی مبارکباد پیش کرتے ہوئے اس امید کا اظہار کیا ہے کہ یہ ننھا ہیرو مستقبل میں پاکستان کا نام پوری دنیا میں مزید روشن کرے گا۔
عوامی حلقوں نے دعا کی ہے کہ اللہ تعالیٰ ازلان شاہ کو مزید کامیابیاں عطا فرمائے اور انہیں عالمی سطح پر پاکستان کا پرچم بلند کرنے کی توفیق بخشے۔
اپر دیر کا ننھا ہیرو : انٹرنیشنل گولڈ میڈلسٹ ازلان شاہ نے چند دنوں میں 4 تمغے جیت کر تاریخ رقم کر دی
