خوشاب (راجہ نورالہی عاطف سے)
ڈپٹی کمشنر خوشاب ڈاکٹر جہانزیب حسین لابر کی زیرِ صدارت کانفرنس ہال میں ڈینجرس اور خستہ حال عمارتوں کے حوالے سے اہم جائزہ اجلاس منعقد ہوا۔ اجلاس میں ضلع بھر کی چاروں تحصیلوں میں سرکاری، نیم سرکاری اور نجی عمارتوں کے جاری سروے کی پیش رفت کا تفصیلی جائزہ لیا گیا۔ اجلاس کے دوران چاروں تحصیلوں کے اسسٹنٹ کمشنرز، ریسکیو 1122، محکمہ صحت، محکمہ تعلیم، بلڈنگز ڈیپارٹمنٹ اور دیگر متعلقہ محکموں کے افسران نے خستہ حال اور خطرناک عمارتوں کی موجودہ صورتحال کے بارے میں ڈپٹی کمشنر کو بریفنگ دی۔ مون سون بارشوں کے دوران خوشاب شہر کے قاضی سٹریٹ، حسین آباد، موضع نلی بولہ اور دیگر علاقوں میں پیدا ہونے والی صورتحال کے حوالے سے ریسکیو انچارج علی حسین نے تفصیلی بریفنگ دی۔ ڈپٹی کمشنر ڈاکٹر جہانزیب حسین لابر نے ہدایت کی کہ جن محکموں کی پرانی عمارتوں یا اثاثوں کو خطرناک قرار دیا جا چکا ہے، ان میں عملہ اور دفاتر رکھنے سے گریز کیا جائے۔ انہوں نے متعلقہ افسران کو ہدایت کی کہ ایسی عمارتوں کو خالی کرانے یا مسمار کرنے کے لیے متعلقہ ہیڈ آفس کو فوری طور پر سمری ارسال کی جائے۔ انہوں نے مزید ہدایت کی کہ چاروں تحصیلوں میں متعلقہ افسران خود فیلڈ میں جا کر خستہ حال عمارتوں کا معائنہ کریں اور خطرناک قرار دی جانے والی عمارتوں کے حوالے سے فوری حفاظتی اقدامات یقینی بنائے جائیں۔ اجلاس میں ڈپٹی ڈائریکٹر ڈویلپمنٹ سہیل سکندر رانجھا، سی ای او ضلع کونسل، اسسٹنٹ ڈائریکٹر پنجاب ڈویلپمنٹ پروگرام قاسم لالی، ڈی ایچ او راؤ گلزار یوسف، ریسکیو انچارج علی حسین، ایس ڈی او بلڈنگ، ایکسیئن ہائی وے ذیشان انور، محکمہ تعلیم اور دیگر متعلقہ محکموں کے افسران نے شرکت کی، جبکہ اسسٹنٹ کمشنرز نورپور شازیہ رحمان، نوشہرہ ثمینہ بشیر اور قائدآباد حسیب الرحمان نے ویڈیو لنک کے ذریعے اجلاس میں شرکت کی۔