بوگوٹا: لاطینی امریکی ملک کولمبیا میں پیر کے روز آنے والے انتہائی طاقتور اور تباہ کن زلزلے کے نتیجے میں انسانی المیہ جنم لے چکا ہے۔ امریکی جیولوجیکل سروے (USGS) کے مطابق 7.4 شدت کے اس زلزلے کا مرکز چوکو کے علاقے سین جوز دیل پلمار کے قریب تھا، جو دارالحکومت بوگوٹا سے تقریباً 280 کلومیٹر مغرب میں 107 کلومیٹر کی گہرائی میں واقع تھا۔ تازہ ترین اطلاعات کے مطابق اس ہولناک آفت کی وجہ سے اب تک 132 افراد ہلاک جبکہ 570 سے زائد زخمی ہو چکے ہیں۔
سی این این اور نیویارک ٹائمز کی رپورٹس کے مطابق زلزلے کے مرکز کے قریب واقع شہر پریرا میں سب سے زیادہ جانی و مالی نقصان ہوا ہے، جہاں اکیلے صرف اسی شہر میں 60 افراد جان کی بازی ہار گئے۔ ملک بھر میں ہنگامی صورتحال کے پیش نظر پانچ بڑے شہروں میں ریڈ الرٹ نافذ کر دیا گیا ہے۔ سرکاری ذرائع کے مطابق زلزلے کے باعث 86 سے زائد عمارتیں مکمل طور پر زمین بوس ہو چکی ہیں، جبکہ 1,500 سے زائد رہائشی عمارتیں، 18 صحت مراکز اور 52 اسکولوں کو شدید نقصان پہنچا ہے۔ وسطی کولمبیا کا رسارالڈا (Risaralda) کا علاقہ اس تباہی کی زد میں سب سے زیادہ آیا ہے۔
تباہ کن زلزلے اور ممکنہ آفٹر شاکس کے خطرے کے پیش نظر ملک بھر کے سات اہم ہوائی اڈوں پر فلائٹ آپریشن تاحال معطل ہیں۔ حکام کے مطابق امدادی اور ریسکیو آپریشن جنگی بنیادوں پر جاری ہے اور ملبے تلے دبے افراد کو نکالنے کے لیے ہیوی مشینری کا استعمال کیا جا رہا ہے۔ شمال مغربی چوکو کی گورنر نوبیا کیرولینا کورڈوبا کیوری نے کوئبڈو شہر میں ہونے والے نقصانات کی تصدیق کرتے ہوئے آفٹر شاکس کے پیش نظر شہریوں کو محتاط رہنے کی ہدایت کی ہے۔
دارالحکومت بوگوٹا کے میئر کارلوس ایف گالان نے سماجی رابطے کی ویب سائٹ ’ایکس‘ پر اعلان کیا ہے کہ زلزلے سے متاثرہ علاقوں کے لیے امدادی اشیاء جمع کرانے کے لیے چھ نئے مراکز قائم کر دیے گئے ہیں۔ شہریوں سے اپیل کی گئی ہے کہ وہ متاثرہ بھائیوں کے لیے پینے کا پانی، کمبل، خشک راشن، حفظان صحت کا سامان اور فرسٹ ایڈ کٹس عطیہ کریں۔ حکومتی سطح پر متاثرین کی بحالی کے لیے تمام ضروری اقدامات اٹھائے جا رہے ہیں۔
کولمبیا میں زلزلےسے ہلاکتوں کی تعداد 132 ہوگئی، 570 زخمی، پانچ بڑے شہروں میں ریڈ الرٹ!
