اسلام آباد / لاہور: صوبہ پنجاب میں طویل عرصے سے التوا کا شکار بلدیاتی انتخابات کے انعقاد اور پولنگ کی تاریخ کے حتمی اعلان کے سلسلے میں ایک بڑی اور اہم پیش رفت سامنے آئی ہے۔
الیکشن کمیشن آف پاکستان نے پنجاب حکومت کو باضابطہ خط لکھ کر ایک خصوصی صوبائی کابینہ کمیٹی تشکیل دینے کی ہدایت کی ہے تاکہ انتخابی عمل کو آگے بڑھایا جا سکے۔
الیکشن کمیشن اور پنجاب حکومت کے مابین بلدیاتی انتخابات کے انعقاد اور اس کی تاریخ کے تعین پر تفصیلی مشاورت کے لیے ایک اہم اجلاس طلب کر لیا گیا ہے۔ یہ مشاورتی اجلاس آئندہ چند روز بعد 20 اگست کو اسلام آباد میں الیکشن کمیشن کے سیکرٹریٹ میں منعقد ہوگا۔
الیکشن کمیشن کی ہدایت پر پنجاب حکومت کی جانب سے تشکیل دی جانے والی یہ کابینہ کمیٹی کمیشن کے ساتھ ہونے والے اس اہم اجلاس میں شرکت کرے گی اور انتخابات کے انعقاد کے لیے درکار انتظامات، قانونی تقاضوں اور تاریخ پر غور و خوض کیا جائے گا۔ اس اجلاس کے بعد امید کی جا رہی ہے کہ صوبے میں بلدیاتی انتخابات کی تاریخ کا باضابطہ اعلان کر دیا جائے گا۔
