مٹیاری رپورٹ عامر علی انڑ
جیئے سندھ قومی محاذ (جسقم) شہید بشیر خان قریشی پارٹی کے زیرِ اہتمام کاہوڑی رہنما شہید عرفان مہدی کی 36ویں برسی ان کے آبائی گاؤں مہندی ہاؤس، ہالا پرانا میں عقیدت و احترام کے ساتھ منائی گئی۔اس موقع پر جسقم شہید بشیر خان قریشی پارٹی کے چیئرمین ڈاکٹر نیاز کالانی، جیئے سندھ تحریک کے چیئرمین سورہہ سندھی، ضلعی صدر عابد شاہانی، نائب صدر داؤد آرائیں، جنرل سیکریٹری ندیم مہندی، مالیاتی سیکریٹری بادل سندھی، شہید عرفان مہدی کے بھائی رئیس مسعود مہدی سمیت دیگر رہنماؤں اور کارکنوں نے شہید کی مزار پر حاضری دی، پھولوں کی چادریں چڑھائیں، قومی ترانہ پڑھا اور انہیں زبردست خراجِ عقیدت پیش کیا.تقریب سے خطاب کرتے ہوئے مقررین نے کہا کہ شہید عرفان مہدی نے سندھ کی قومی تحریک میں تاریخی اور نمایاں کردار ادا کیا۔ ان کی جدوجہد، قربانیاں اور فکر آج بھی سندھ کے نوجوانوں کے لیے مشعلِ راہ ہیں۔ انہوں نے کہا کہ شہید عرفان مہدی کی شہادت سے پیدا ہونے والا خلا آج تک پُر نہیں ہو سکا۔مقررین نے مزید کہا کہ موجودہ دور میں سندھ کو متعدد سنگین مسائل کا سامنا ہے۔ ان کے مطابق سندھ کے وسائل، حقوق اور شناخت مختلف چیلنجز کی زد میں ہیں، جبکہ مہنگائی، بے روزگاری اور غربت نے عام آدمی کی زندگی کو شدید مشکلات سے دوچار کر دیا ہے۔