دیر بالا(بیورو چیف ریاض ابوالخیل)
یوم شہداء پولیس کے سلسلے میں ضلعی سطح پر مرکزی تقریب پولیس ہیڈکوارٹر دیر بالا میں منعقد ہوئی، جسمیں ڈسٹرکٹ پولیس آفیسر دیر بالا اسلم نواز ()، لفٹیننٹ کرنل ابرار 184 ونگ دیر سکاوٹس، ایس پی انوسٹی گیشن محمد الیاس خان، ایڈیشنل ڈپٹی کمشنر دیر بالا، پولیس و ضلعی انتظامیہ کے افسران، سیاسی و سماجی شخصیات، میڈیا نمائندگان، شہداء کے لواحقین، غازیوں اور پولیس جوانوں نے شرکت کی۔
تقریب کے دوران پولیس کے چاک و چوبند دستے نے یادگار شہداء پر سلامی پیش کی، پھول چڑھائے گئے، فاتحہ خوانی کی گئی اور شہداء کی بلند درجات و ملک کی سلامتی کے لیے خصوصی دعا کی گئی۔
اس موقع پر مقررین نے شہدائے پولیس کی لازوال قربانیوں کو زبردست خراج تحسین پیش کرتے ہوئے کہا کہ خیبرپختونخوا پولیس نے دہشت گردی اور جرائم کے خلاف بے مثال قربانیاں دے کر امن کے قیام میں تاریخی کردار ادا کیا ہے۔ لفٹیننٹ کرنل ابرار نے اپنے خطاب میں کہا کہ پولیس کی قربانیاں قوم کا قیمتی سرمایہ ہیں اور شہداء کی خدمات ہمیشہ یاد رکھی جائیں گی۔
اس موقع پر ڈی پی او دیر بالا نے کہا کہ شہداء پولیس ہماری قوم کا فخر ہیں، جن کی لازوال قربانیوں کی بدولت عوام کے جان و مال کا تحفظ یقینی بنایا جا رہا ہے۔ خیبرپختونخوا، بالخصوص ضلع دیر بالا میں پولیسنگ کا معیار مثالی ہے اور انہیں دیر بالا کی دلیر، فرض شناس اور عوام دوست پولیس فورس کی قیادت پر فخر ہے۔ انہوں نے کہا کہ شہداء کے خاندان پولیس فورس کا حصہ ہیں اور ان کی فلاح و بہبود ترجیحی بنیادوں پر یقینی بنائی جا رہی ہے۔
اختتام پر ڈی پی او دیر بالا نے شہداء کے لواحقین سے ملاقات کی، ان کے مسائل سنے اور انہیں تحائف بھی تقسیم کٸے