سیالکوٹ۔سلیم احمد اعوان شیخو
حضرت امام حسینؑ کے چہلم کے موقع پر امن و امان اور انتظامات کا جائزہ لینے کے لئے دفتر ڈپٹی کمشنر سیالکوٹ میں ضلعی امن کمیٹی کا اجلاس منعقد ہوا۔ اجلاس کی صدارت ڈپٹی کمشنر سیالکوٹ محمد اویس مشتاق اور ڈسٹرکٹ پولیس آفیسر دوست محمد نے مشترکہ طور پر کی۔ اجلاس میں صدر ضلعی امن کمیٹی حافظ اصغر علی چیمہ سمیت تمام مکاتب فکر کے علماء کرام، مشائخ اور متعلقہ محکموں کے افیسران نے شرکت کی۔اجلاس میں چہلم کے جلوسوں اور مجالس کے انتظامات، سکیورٹی، ٹریفک مینجمنٹ، صفائی ستھرائی، بنیادی سہولیات کی فراہمی اور دیگر انتظامی امور پر تفصیلی غور کیا گیا۔ ڈپٹی کمشنر محمد اویس مشتاق نے فرداً فرداً تمام علماء کرام اور مشائخ کی آراء سنیں اور متعلقہ افسران کو مسائل کے فوری حل کیلئے ضروری ہدایات جاری کیں محمد اویس مشتاق نے کہا کہ بارش کی صورت میں ماتمی جلوسوں کے روٹس سے پانی کی فوری نکاسی اور راستوں کو قابل استعمال رکھنے کیلئے بروقت اقدامات یقینی بنائے جائیں گے۔ جلوسوں اور مجالس کے روٹس پر صفائی، روشنی، پینے کے صاف پانی اور دیگر بنیادی سہولیات کی فراہمی یقینی بنائی جائے گی۔