کراچی :پاکستان بحریہ نے گوادر سے تقریباً 120 بحری میل جنوب میں انجن خراب ہونے کے باعث سمندر میں پھنس جانے والی ماہی گیر کشتی ”الجلالی“ کے تمام 19 ارکان پر مشتمل عملے کو بحفاظت ریسکیو کر لیا۔
جاری بیان کے مطابق کشتی میں سوار 19 افراد میں 11 پاکستانی اور 8 ایرانی شہری شامل تھے، جو انجن خراب ہونے کے باعث سمندر میں پھنس گئے تھے۔
بیان میں کہا گیا کہ شمالی بحیرۂ عرب میں جاری مون سون کے دوران خراب موسم نے صورتحال کو مزید سنگین بنا دیا تھا، جس کے باعث عملے کی جانوں کو فوری خطرات لاحق ہو گئے تھے۔امدادی کال موصول ہوتے ہی جوائنٹ میری ٹائم انفارمیشن اینڈ کوآرڈی نیشن سینٹر(جے ایم آئی سی سی) نے فوری طور پر پاکستان بحریہ سے رابطہ کرکے سرچ اینڈ ریسکیو آپریشن شروع کیا۔ امدادی کارروائی کے لیے جنگی بحری جہاز پی این ایس تیمور کو فوری طور پر روانہ کیا گیا، تاکہ متاثرہ ماہی گیر کشتی کو مدد فراہم کی جا سکے۔
بحریہ کی بروقت اور مؤثر کارروائی کے نتیجے میں کشتی کے عملے کو سمندر میں ہی خوراک، پینے کا صاف پانی اور طبی سہولتیں فراہم کی گئیں، جس کے بعد متاثرہ کشتی کو بحفاظت ساحل کی جانب کھینچ کر لے جایا گیا۔
صدرآصف زرداری ، وزیراعظم شہباز شریف کاخراج تحسین
دوسری جانب صدر آصف علی زرداری اور وزیراعظم شہباز شریف نے شمالی بحیرۂ عرب میں پھنسے ماہی گیروں کو بحفاظت ریسکیو کرنے پر پاکستان بحریہ کی کارکردگی کو سراہا۔اپنے بیان میں صدر مملکت نے کہا کہ سمندر میں انسانی جانوں کا تحفظ پاکستان بحریہ کے قومی اور بین الاقوامی ذمہ داریوں سے بھرپور عزم کا مظہر ہے۔
پاک بحریہ کا بروقت ریسکیو آپریشن: گوادر کے قریب سمندر میں ماہی گیر کشتی سے 8 ایرانی شہریوں سمیت 19 افراد کو بچا لیا
