چکوال: رپورٹ: جلیل نقوی
کمشنر راولپنڈی ڈویژن سلیمان غنی نے ضلع چکوال کا دورہ کرتے ہوئے ڈپٹی کمشنر آفس میں اجلاس کی صدارت کی اور جاری ترقیاتی منصوبوں پر پیش رفت کا تفصیلی جائزہ لیا۔ اجلاس میں ڈپٹی کمشنر سارہ حیات، ایڈیشنل ڈپٹی کمشنر ریونیو محمد شہاب اسلم، ایڈیشنل ڈپٹی کمشنر جنرل بلال بن عبدالحفیظ، اسسٹنٹ کمشنرز، تعمیراتی محکموں اور دیگر متعلقہ اداروں کے افسران نے شرکت کی۔ ڈپٹی کمشنر سارہ حیات نے ضلع بھر میں جاری ترقیاتی سکیموں پر تفصیلی بریفنگ دی۔کمشنر سلیمان غنی نے ہدایت کی کہ تمام ترقیاتی منصوبوں کی معیاری اور مقررہ مدت میں تکمیل ہر صورت یقینی بنائی جائے تاکہ عوام کو حکومتی سہولیات اور ترقیاتی منصوبوں کے ثمرات بروقت میسر آ سکیں۔ حکومت پنجاب کی جانب سے فراہم کیے گئے ترقیاتی فنڈز عوام کی امانت ہیں، اس لیے تعمیراتی معیار پر کوئی سمجھوتہ نہ کیا جائے اور ہر مرحلے پر مؤثر مانیٹرنگ کو یقینی بنایا جائے۔بعد ازاں کمشنر راولپنڈی ڈویژن نے بھون روڈ پر جاری تعمیراتی کاموں، بیوٹیفکیشن منصوبے کے تحت چھپڑ بازار میں جاری ترقیاتی سرگرمیوں، ڈسٹرکٹ ہیڈکوارٹرز ہسپتال چکوال میں طبی سہولیات، جبکہ گزشتہ برس مون سون بارشوں سے متاثر ہونے والے ڈوھمن پل اور تکیہ شاہ مراد کازوے پر بحالی و حفاظتی اقدامات کا بھی معائنہ کیا۔ انہوں نے متعلقہ افسران کو ہدایت کی کہ مون سون سیزن کے دوران عوام کے جان و مال کے تحفظ، بلا تعطل آمدورفت اور تمام ترقیاتی منصوبوں کی مؤثر نگرانی کے لیے ضروری انتظامات ہر وقت مکمل رکھے جائیں۔