حمزہ شہباز کی ماجد ظہور کی رہائش گاہ آمد، والدہ کے انتقال پر تعزیت؛ ’ورکرز ہی سیاسی جماعت کی اصل پہچان ہیں‘

لاہور: سابق وزیراعلیٰ پنجاب اور پاکستان مسلم لیگ (ن) کے رہنما حمزہ شہباز شریف نے لاہور کے علاقے لارنس روڈ پر سابق ایم پی اے ماجد ظہور کی رہائش گاہ کا دورہ کیا، جہاں انہوں نے ماجد ظہور سے ان کی والدہ کے انتقال پر دلی تعزیت کی۔
اس موقع پر مرحومہ کے درجات کی بلندی اور مغفرت کے لیے خصوصی دعا اور فاتحہ خوانی کی گئی۔
محفل کے دوران معروف نعت خواں حافظ وسیم عباس نے میاں محمد بخش کا کلام پیش کر کے ماحول کو رقت آمیز بنا دیا۔ حمزہ شہباز نے پارٹی کے سینئر ورکرز سے بھی خصوصی ملاقات کی اور ان کے دکھ سکھ بانٹے۔ اس موقع پر عمران علی گورائیہ، میاں محمد طارق، رانا احسن شرافت سمیت پارٹی کے دیگر اہم رہنما اور سماجی شخصیات بھی موجود تھیں۔
: صحافیوں سے غیر رسمی گفتگو کرتے ہوئے حمزہ شہباز نے وزیراعظم شہباز شریف کی پالیسیوں کو سراہا۔ انہوں نے کہا کہ "وزیراعظم شہباز شریف کی شب و روز محنت اور لگن کا نتیجہ ہے کہ آج دنیا بھر میں پاکستان کا نام گونج رہا ہے۔ آج آپ افریقہ کے کسی بھی کونے میں چلے جائیں، وہاں کے لوگ بھی پاکستان کو عزت کی نگاہ سے دیکھتے ہیں۔” انہوں نے مزید کہا کہ وزیراعظم کی نیت صاف ہے، اسی لیے اللہ تعالیٰ کی مدد سے ملکی معیشت اور ترقی کے راستے ہموار ہو رہے ہیں۔
حمزہ شہباز نے پارٹی کارکنوں کی قربانیوں کو خراجِ تحسین پیش کرتے ہوئے کہا کہ سیاسی جماعت کسی ایک فرد کا نام نہیں، بلکہ ورکرز ہی اصل پہچان ہوتے ہیں۔ "کارکنان دھوپ، سردی، گرمی اور ہر قسم کی موسمی سختیوں کا مقابلہ کرکے پارٹی کو زندہ رکھتے ہیں۔ جن جماعتوں کے پاس وفادار ورکرز نہ ہوں، ان کی حیثیت کچھ بھی نہیں۔”