سکھر: رپورٹ بیورو چیف محمد قاسم ملک
ٹاؤن جیئی شاہ کمیٹی سکھر، یونین کونسل نمبر 9 بروہی محلہ گلشنِ اقبال کے رہائشیوں نے بنیادی شہری سہولیات کی عدم فراہمی کے خلاف بچوں اور بزرگوں سمیت احتجاجی مظاہرہ کیا،مظاہرین نے مطالبہ کیا کہ علاقے میں فوری طور پر ترقیاتی کام کرائے جائیں اور نکاسی آب کا دیرینہ مسئلہ حل کیا جائے،احتجاج میں خدمت علی، امیر علی، لکمیر ملک اور علی گوہر چانڈیو سمیت دیگر افراد نے شرکت کی۔ مظاہرین کا کہنا تھا کہ یونین کونسل نمبر 9 کے وارڈ نمبر 2 کو مسلسل نظر انداز کیا جا رہا ہے اور علاقے میں کوئی ترقیاتی کام نہیں ہو رہے۔ انہوں نے سوال اٹھایا کہ "کیا ہم انسان نہیں؟”ڈرینج نا مناسب ہونے کی صورت میں گندے ڈرینج کا پانی گھروں میں داخل ہو چکا ہے، جس کے باعث خواتین، بزرگ اور معصوم بچے شدید مشکلات کا شکار ہیں جبکہ مختلف بیماریوں میں بھی مبتلا ہو رہے ہیں۔ ان کا کہنا تھا کہ متعدد بار متعلقہ نمائندوں اور حکام کو شکایات کے باوجود کوئی عملی اقدام نہیں کیا گیا، انہوں نے اعلیٰ حکام، میئر سکھر اور متعلقہ اداروں سے مطالبہ کیا کہ علاقے میں فوری طور پر نکاسی آب کا مؤثر انتظام کیا جائے، ترقیاتی کام شروع کیے جائیں اور شہریوں کو بنیادی سہولیات فراہم کی جائیں، بصورت دیگر احتجاج کا دائرہ وسیع کرنے پر مجبور ہوں گے۔