جیکب آباد رپورٹ مجیب کھوسو
جیکب آباد پولیس نے وفاقی سول حساس ادارے کی خفیہ اطلاع پر کامیاب کارروائی کرتے ہوئے قیمتی تاریخی نوادرات کی اسمگلنگ اور چوری میں مبینہ طور پر ملوث بین الصوبائی اسمگلر سید لال شاہ ولد سردار شاہ، سکنہ نوشہرو گنداوا، ضلع جھل مگسی، بلوچستان کو ممل لنک روڈ سے گرفتار کر لیا۔ کارروائی کے دوران ملزم کے قبضے سے غیر قانونی اسلحہ اور تفتیش کے لیے اہم شواہد برآمد کر لیے گئے، جبکہ مزید قانونی کارروائی جاری ہے۔ابتدائی تفتیش کے دوران ملزم نے مبینہ طور پر انکشاف کیا کہ وہ پاکستان کے مختلف تاریخی مقامات پر موجود قیمتی نوادرات کی ریکی کر کے انہیں چوری اور اسمگلنگ کرنے والے نیٹ ورک سے وابستہ رہا ہے۔ ملزم نے حال ہی میں موہن جودڑو میں نمائش کے لیے رکھے گئے قیمتی نوادرات کا جائزہ لیا اور اپنے ساتھیوں کے ساتھ ڈکیتی کا منصوبہ بنایا۔ اس مقصد کے لیے مبینہ طور پر مقامی افراد کو بھی شامل کیا گیا تاکہ قیمتی نوادرات چوری کر کے بلوچستان کے راستے بیرونِ ملک اسمگل کیے جا سکیں۔ابتدائی معلومات کے مطابق ملزم ایک منظم بین الاقوامی اسمگلنگ نیٹ ورک سے مبینہ طور پر وابستہ ہے، جو پاکستان کے مختلف علاقوں سے قیمتی نوادرات اور نایاب تاریخی اشیاء کی اسمگلنگ میں سرگرم رہا ہے۔ برآمد ہونے والے شواہد اور تفتیش کی روشنی میں ملزم کے دیگر ساتھیوں، سہولت کاروں اور اسمگلنگ نیٹ ورک کے خلاف کارروائیاں بھی تیز کر دی گئی ہیں۔یہ کامیاب کارروائی انچارج سی آئی اے، شاہین فورس، آئی ٹی برانچ اور وفاقی سول حساس ادارے کے اہلکاروں نے مشترکہ طور پر انجام دی۔