سکھر ( رپورٹ / عبد الرحمان راجپوت)
سکھر کے گنجان آباد علاقے نیو پنڈ بھوسہ لائن، رہبر مسجد کے قریب واقع یو سی 8 وارڈ 4 کے مکینوں نے میئر سکھر، ڈپٹی میئر، چیئرمین رمضان عباسی، کونسلر گل پٹھان اور دیگر اعلیٰ حکام سے اپیل کی ہے کہ علاقے کی خستہ حال گلیوں اور بنیادی سہولیات کی کمی کا فوری نوٹس لیا جائے۔اہلِ علاقہ کے مطابق متعدد گلیاں ٹوٹ پھوٹ کا شکار ہیں، جس کے باعث شہریوں، بزرگوں، خواتین اور اسکول جانے والے بچوں کو روزانہ مشکلات کا سامنا کرنا پڑتا ہے۔ مقامی افراد کا کہنا ہے کہ کئی مقامات پر اسٹریٹ لائٹس کی اشد ضرورت ہے، جبکہ رات کے وقت اندھیرے کی وجہ سے عوام کو مشکلات اور عدم تحفظ کا احساس رہتا ہے۔شہریوں نے میئر سکھر، ڈپٹی میئر اور متعلقہ حکام سے مطالبہ کیا ہے کہ علاقے کا دورہ کرکے زمینی حقائق کا جائزہ لیا جائے اور گلیوں کی مرمت، پختگی اور اسٹریٹ لائٹس کی تنصیب کے لیے فوری اقدامات کیے جائیں تاکہ عوام کو بنیادی سہولیات میسر آ سکیں۔اہلِ علاقہ نے امید ظاہر کی ہے کہ متعلقہ حکام عوامی مسائل کے حل کے لیے سنجیدہ اقدامات کرتے ہوئے نیو پنڈ بھوسہ لائن کے دیرینہ مسائل کو ترجیحی بنیادوں پر حل کریں گے۔