چوک اعظم: تھانہ چوک اعظم کی حدود میں واقع چک 387 میں رقبے کے تنازع پر انسانیت سوز واقعہ پیش آیا، جہاں ایک خاندان کے تنازعے کے باعث رانا امین نمبردار (مرحوم) کے جنازے اور تدفین کو روکنے کی کوشش کی گئی۔
مذکورہ رقبے کا تنازع رانا اور ہانس برادری کے درمیان طویل عرصے سے جاری تھا۔ رمضان ہانس نے موقف اختیار کیا کہ انہوں نے مرحوم نمبردار کو رقبے کے عوض 40 لاکھ روپے ادا کیے تھے اور رقبے کا قبضہ بھی ان کے پاس ہے۔ ان کا کہنا تھا کہ اب رانا امین کے ورثاء اس حوالے سے قانونی بیان دینے سے انکاری ہیں، جس پر انہوں نے مرحوم کے بیٹوں کی جانب سے گارنٹی ملنے تک جنازہ روکنے کا اعلان کیا تھا۔
تدفین روکے جانے کے بعد صورتحال کشیدہ ہو گئی، جس پر مرحوم کے بیٹوں نے فوری طور پر پولیس ایمرجنسی سروس 15 کو کال کر کے مدد طلب کی۔ پولیس کی بھاری نفری موقع پر پہنچ گئی، جس کے بعد مقامی پولیس کی موجودگی اور نگرانی میں مرحوم رانا امین نمبردار کی آخری رسومات ادا کی گئیں اور انہیں سپردِ خاک کر دیا گیا۔