جیکب آباد رپورٹ مجیب کھوسو
جیکب آباد: سٹی تھانے کی حدود شکارپور حویلی کے رہائشی وشال کمار کے گھر میں ایک افسوسناک حادثہ پیش آیا، جہاں بجلی کے شارٹ سرکٹ کے باعث کمرے میں نصب ایئر کنڈیشنر میں اچانک آگ بھڑک اٹھی۔اطلاعات کے مطابق آگ نے دیکھتے ہی دیکھتے کمرے کو اپنی لپیٹ میں لے لیا، جس کے نتیجے میں گھر میں موجود وشال کمار کی اہلیہ سمرن کماری شدید جھلس گئی اور موقع پر ہی دم توڑ گئی۔واقعے کے بعد گھر میں کہرام مچ گیا جبکہ علاقے میں بھی سوگ کی فضا قائم ہوگئی۔ اطلاع ملتے ہی متعلقہ عملہ اور مقامی افراد موقع پر پہنچ گئے اور آگ پر قابو پالیا گیا۔پولیس اور متعلقہ حکام نے واقعے کی تحقیقات شروع کردی ہیں جبکہ متوفیہ کی لاش ضروری کارروائی کے لیے اسپتال منتقل کردی گئی ہے۔ اہل خانہ کے مطابق اس المناک حادثے سے پورا خاندان شدید صدمے سے دوچار ہے۔