نوابشاہ (رپورٹ: نفیس آرائیں)
ایس ایس پی شہید بینظیر آباد سمیر نور چنہ کی خصوصی ہدایات پر ضلع بھر میں امن و امان کی صورتحال برقرار رکھنے اور جرائم پیشہ عناصر کے خلاف مؤثر کارروائیوں کے سلسلے میں سخت سنیپ چیکنگ اور جامع ناکہ بندی کا سلسلہ جاری ہے۔پولیس نے ضلع کے تمام داخلی و خارجی راستوں پر بھاری نفری تعینات کرکے چیکنگ کا عمل مزید مؤثر بنا دیا ہے، جبکہ تمام ڈویژنز کے ڈی ایس پیز اور تھانوں کے ایس ایچ اوز خود فیلڈ میں موجود رہ کر سیکیورٹی اقدامات کی نگرانی کر رہے ہیں۔ دورانِ چیکنگ مشکوک افراد، بغیر نمبر پلیٹ اور کالے شیشوں والی گاڑیوں کے خلاف قانونی کارروائی عمل میں لائی جا رہی ہے اور شہریوں کے کوائف کی موقع پر تصدیق بھی کی جا رہی ہے۔ایس ایس پی سمیر نور چنہ نے کہا ہے کہ شہریوں کے جان و مال کا تحفظ پولیس کی اولین ذمہ داری ہے، ضلع کے امن کو سبوتاژ کرنے والے عناصر کے خلاف بلاامتیاز کارروائی جاری رہے گی۔ انہوں نے شہریوں سے دورانِ سفر شناختی کارڈ اور گاڑی کے اصل کاغذات ہمراہ رکھنے اور کسی بھی مشکوک سرگرمی کی فوری اطلاع پولیس کو دینے کی اپیل کی۔