دیر بالا (ریاض ابوالخیل بیورو چیف)
دیر بالا: تھانہ دیر سٹی کے حدود علاقہ بیکارے/قولگا سائیڈ میں نامعلوم مسلح ملزمان کی جانب سے ایک سرکاری سکول ٹیچر پر فائرنگ کرکے اسے شدید زخمی کرنے کا افسوسناک واقعہ پیش آیا۔ واقعہ کی اطلاع ملتے ہی علاقے میں خوف و ہراس پھیل گیا جبکہ طلبہ، اساتذہ اور مقامی عوام میں شدید تشویش کی لہر دوڑ گئی۔ واقعہ سوشل میڈیا پر بھی تیزی سے وائرل ہوا جس پر ڈسٹرکٹ پولیس آفیسر دیر بالا اسلم نواز نے فوری اور سخت نوٹس لیتے ہوئے ملوث ملزمان کی بلا تاخیر گرفتاری کے احکامات جاری کیے۔ڈی پی او دیر بالا کی خصوصی ہدایات کی روشنی میں ایس ڈی پی او سرکل دیر مشرف خان کی نگرانی میں ایس ایچ او تھانہ دیر سٹی جوہر علی خان نے ہمراہ نفری پولیس جدید تفتیشی خطوط، تکنیکی شواہد اور پیشہ ورانہ مہارت کو بروئے کار لاتے ہوئے فوری کارروائی کا آغاز کیا۔ پولیس ٹیم نے انتھک محنت اور معلومات کی بنیاد پر واقعہ میں ملوث مرکزی ملزمان شازواللہ ولد روزی محمد اور انیس الرحمن ولد معاذ اللہ ساکنان روخان بالا کو محض 6 گھنٹوں کے اندر گرفتار کر لیا۔ گرفتار ملزمان سے مزید تفتیش جاری ہے۔