ٹنڈوالہیار رپورٹ تیمور رضا قائم خانی
ڈپٹی کمشنر ٹنڈوالہیار نور مصطفیٰ لغاری کی زیر صدارت کانفرنس ہال ڈپٹی کمشنر آفس میں محرم الحرام 2026 کے انتظامات کے سلسلے میں ایک اہم اجلاس منعقد ہوا۔ اجلاس میں ایس ایس پی ٹنڈوالہیار سید سلیم شاہ،چیئرمین ڈسٹرکٹ کاؤنسل ٹنڈو الہیار میر سہیل پپو ٹالپر، ایڈیشنل ڈپٹی کمشنر ون آصف علی خاصخیلی، ایڈیشنل ڈپٹی کمشنر ٹو میڈم وردہ نایاب، اسسٹنٹ کمشنر ٹنڈوالہیار بابر صالح راہپوٹہ، اسسٹنٹ کمشنر چمبڑ حماد علی زرداری، اسسٹنٹ کمشنر جھنڈو مری شہزاد عمیر جروار، ڈسٹرکٹ ہیلتھ آفیسر ڈاکٹر بھارو مل، میونسپل کمیٹی، محکمہ صحت، محکمہ تعلیم، پبلک ہیلتھ انجینئرنگ، حیسکو، سول ڈیفنس، ریسکیو، لوکل گورنمنٹ، محکمہ اطلاعات اور دیگر متعلقہ محکموں کے ضلعی افسران کے علاوہ تمام مکاتبِ فکر سے تعلق رکھنے والے علماء کرام نے شرکت کی۔ اجلاس میں ضلع بھر میں محرم الحرام کے دوران مجالس، جلوسوں، سیکیورٹی، صفائی ستھرائی، بجلی، پانی، ٹریفک اور ہنگامی امدادی انتظامات کا تفصیلی جائزہ لیا گیا اجلاس سے خطاب کرتے ہوئے ڈپٹی کمشنر نور مصطفیٰ لغاری نے کہا کہ محرم الحرام کے دوران امن و امان کا قیام، عزاداروں کو ہر ممکن سہولتوں کی فراہمی اور مجالس و جلوسوں کے پرامن انعقاد کو یقینی بنانا ضلعی انتظامیہ کی اولین ذمہ داری ہے۔ اجلاس میں محکمہ صحت کے افسران کو ہدایت دی گئی کہ وہ جلوسوں اور مجالس کے مقامات پر طبی امداد کی فراہمی، ایمبولینسز اور میڈیکل ٹیموں کی دستیابی کو یقینی بنائیں جبکہ سول ڈیفنس اور ریسکیو اداروں کو بھی کسی بھی ہنگامی صورتحال سے نمٹنے کے لیے مکمل طور پر الرٹ رہنے کی ہدایت کی گئی آخر میں ڈپٹی کمشنر نور مصطفیٰ لغاری نے تمام متعلقہ محکموں کے افسران کو ہدایت کی کہ وہ محرم الحرام کے دوران بین المسالک ہم آہنگی، بھائی چارے اور مذہبی رواداری کے فروغ کے لیے اپنا مؤثر کردار ادا کریں۔اس موقع پر تمام علماء کرام نے ضلعی انتظامیہ کی جانب سے عشرہ محرم الحرام کے دوران کیے جانے والے انتظامات پر اطمینان کا اظہار کیا اور اپنی جانب سے ہر ممکن تعاون کا یقین دلایا۔