دیر بالا(بیورو چیف ریاض ابوالخیل)
موجودہ سیکیورٹی صورتحال اور علاقائی امن و امان کے تناظر میں چکیاتن سکاوٹس قلعہ میں کمانڈنٹ دیر سکاوٹس اور ڈسٹرکٹ پولیس آفیسر دیر بالا نے علاقہ مشران کے ساتھ ایک اہم جرگہ منعقد کیا۔ملاقات کے دوران علاقے میں امن و امان کی مجموعی صورتحال، عوامی تعاون اور باہمی روابط کے فروغ پر تفصیلی تبادلہ خیال کیا گیا۔ اس موقع پر مشران کی تجاویز بھی سنی گئیں۔کمانڈنٹ دیر سکاوٹس اور ڈی پی او دیر بالا نے کہا کہ ضلع میں پائیدار امن کے قیام میں دیر بالا کے عوام اور مشران کا کردار قابل تحسین ہے، جبکہ عوامی تعاون سے ہی امن و استحکام کو مزید مضبوط بنایا جا سکتا ہے۔علاقہ مشران نے سیکیورٹی فورسز اور پولیس کے ساتھ مکمل تعاون جاری رکھنے کے عزم کا اظہار کرتے ہوئے کہا کہ امن و امان کے قیام اور وطن عزیز کی سلامتی کے لیے ہر ممکن کردار ادا کیا جائے گا۔ملاقات کے اختتام پر ملک و قوم کی سلامتی، امن اور خوشحالی کے لیے خصوصی دعائیں کی گئیں۔