اسلام آباد ہائیکورٹ کابڑا فیصلہ، کتوں کو زہر دینے ، گولی مارنے پر پابندی عائد

اسلام آباد :اسلام آباد ہائیکورٹ نےآوارہ کتوں کی آبادی پر کنٹرول اور تشدد کیخلاف دائر درخواستوں کا فیصلہ جاری کردیا۔
نجی ٹی وی چینل دنیا نیوز کے مطابق اسلام آباد میں آوارہ کتوں کو زہر دینے، گولی مارنے جیسی مہمات پر پابندی عائدکر دی گئی،آوارہ کتوں کی آبادی پر قابو پانے کیلئے سائنسی طریقہ کار اپنانے کی ہدایت کی گئی ہے، عدالت نے وائلڈلائف مینجمنٹ بورڈ، سی ڈی اے اور دیگر فریقین کو پالیسی پر عملدرآمد کا حکم دیدیا،جسٹس خادم حسین سومرو نے 24صفحات پر مشتمل تفصیلی فیصلہ جاری کردیا۔
عدالت نے کہاکہ کمشنر نے وفاقی دارالحکومت میں 7رکنی پیشہ ورانہ کمیٹی تشکیل دے دی۔
عدالت نے کتوں کے کاٹنے کے واقعات اور ویکسی نیشن کا ڈیٹا قائم کرنے کا بھی حکم دیدیا،ترلائی میں آوارہ کتوں کے آبادی کنٹرول سینٹر کے ریکارڈ اور ایس او پیز کو شفاف بنانے کی ہدایت کی گئی ہے۔
عدالت نے کہاکہ پاکستان میں آوارہ جانوروں کے انتظام کا کوئی یکساں قومی قانون موجود نہیں،آوارہ جانوروں سے متعلق نظام صوبائی سطح پر بکھرا ہوا ہے،جانوروں پر ظلم کی روک تھام کا قانون پرانا ہو چکا، اصلاحات کی ضرورت ہے،
فیصلے میں کہا گیا ہے کہ سی ڈی اے کی گاڑی میں مردہ کتوں کی تصاویر سامنے آنے پر شدید تشویش کااظہار کیاگیا،فریقین کتوں کو مبینہ طور پر مارنے کی کوئی قانونی یا معقول وجہ پیش نہ کر سکے۔