سکھر (رپورٹ: عبدالرحمان راجپوت)
شہرِ سکھر کے مصروف ترین علاقے 100 فٹ روڈ سمیت مختلف رہائشی اور تجارتی علاقوں میں اسٹریٹ لائٹس نہ ہونے کے باعث رات کے اوقات میں لوٹ مار، چوری اور دیگر جرائم کی وارداتوں میں خطرناک حد تک اضافہ ہونے لگا ہے۔ شہریوں نے متعلقہ اداروں کی غفلت پر شدید تشویش کا اظہار کرتے ہوئے فوری اقدامات کا مطالبہ کیا ہے۔مقامی شہریوں کا کہنا ہے کہ 100 فٹ روڈ، نیو پنڈ، غریب آباد، بیراج کالونی، شالیمار، بس اسٹینڈ اور دیگر علاقوں میں رات کے وقت اندھیرا چھایا رہتا ہے، جس کا فائدہ اٹھاتے ہوئے جرائم پیشہ عناصر موٹر سائیکل سواروں، راہگیروں اور دکانداروں کو آسانی سے نشانہ بنا رہے ہیں۔ شہری حلقوں نے کہا کہ اسٹریٹ لائٹس کی عدم موجودگی کے باعث خواتین، بزرگ افراد اور طلبہ و طالبات کو شدید مشکلات کا سامنا کرنا پڑ رہا ہے جبکہ رات کے وقت سفر کرنا بھی غیر محفوظ بنتا جا رہا ہے۔ اگر فوری طور پر اسٹریٹ لائٹس بحال نہ کی گئیں تو جرائم کی شرح مزید بڑھ سکتی ہے۔عوام نے میونسپل کارپوریشن سکھر، سیپکو اور ضلعی انتظامیہ سے مطالبہ کیا ہے کہ شہر کے تمام اہم شاہراہوں اور گلی محلوں میں خراب اسٹریٹ لائٹس کو فوری طور پر درست کیا جائے اور نئی لائٹس نصب کر کے شہریوں کو تحفظ فراہم کیا جائے