لاہور:وزیر اطلاعات و ثقافت پنجاب عظمیٰ بخاری کی زیرِ صدارت انفارمیشن اسٹیئرنگ کمیٹی کا اہم اجلاس ہوا جس میں نیشنل ایکشن پلان کے تحت قومی یکجہتی کے فروغ اور امن و امان کے قیام کے لیے اہم فیصلے کیے گئے۔ اجلاس میں سیکرٹری انفارمیشن طاہر رضا ہمدانی، ایڈیشنل سیکرٹری ہوم ماہم آصف، ڈپٹی سیکرٹری فنانس شہزاد ہوتیانہ اور ڈائریکٹر لاء شاہد امتیاز سمیت دیگر متعلقہ حکام نے شرکت کی۔
اجلاس میں فیصلہ کیا گیا کہ نئی نسل میں جذبہ حب الوطنی پیدا کرنے کے لیے تعلیمی نصاب اور صبح کی دعا میں نیشنلزم (حب الوطنی) کو شامل کیا جائے گا۔ کمیٹی نے نصاب میں’’معرکۂ حق‘‘ اور وطن پروری پر مبنی خصوصی مضامین شامل کرنے پر اتفاق کیا۔
اس موقع پر وزیر اطلاعات نے ہدایت کی کہ نجی تعلیمی اداروں میں بھی ’’معرکۂ حق ‘‘اور قومی یکجہتی کے پروگراموں کو اسی جوش و جذبے سے نافذ کیا جائے جیسے سرکاری اداروں میں کیا جاتا ہے۔ شرکاء نے ڈی جی آئی ایس پی آر سے بھی استدعا کی کہ وہ تعلیمی اداروں کے دوروں کا سلسلہ جاری رکھیں تاکہ طلباء کی فکری رہنمائی ہو سکے۔قومی بیانیے کو مضبوط بنانے کے لیے فلم فنڈ کے تحت ”’’معرکۂ حق‘‘ اور قومی یکجہتی پر مبنی فلمیں بنانے کا فیصلہ کیا گیا۔
مزید برآں، الحمراء آرٹس کونسل کے زیر اہتمام شہید لیاقت کی زندگی اور قربانیوں پر مبنی ایک خصوصی ڈرامہ بھی پیش کیا جائے گا۔محرم الحرام کی آمد کے پیش نظر وزیر اطلاعات نے نفرت انگیز مواد پھیلانے والوں کے خلاف کارروائیاں تیز کرنے کا حکم دیا۔ انہوں نے اعلان کیا کہ انفارمیشن ڈیپارٹمنٹ اور ہوم ڈیپارٹمنٹ مل کر ایک ’’خصوصی سیل‘‘ قائم کریں گے جو سوشل میڈیا پر کڑی نظر رکھے گا۔صوبائی وزیر اطلاعات عظمیٰ بخاری نے واضح کیا کہ محرم الحرام کے دوران کسی بھی قسم کی اشتعال انگیزی یا نفرت انگیزی پھیلانے کی ہرگز اجازت نہیں دی جائے گی۔ سوشل میڈیا پر شر پسندی پھیلانے والے عناصر کی فوری نشاندہی کی جائے گی اور ان کے خلاف سخت قانونی کارروائی عمل میں لائی جائے گی۔ ہمارا خصوصی سیل عوام تک بروقت اور درست معلومات کی رسائی کو یقینی بنائے گا تاکہ افواہوں کا خاتمہ ہو سکے۔
اجلاس کے اختتام پر صوبے بھر میں قومی یکجہتی اور بھائی چارے کے فروغ کے لیے وسیع پیمانے پر ”’’عوامی آگاہی مہم‘‘’ شروع کرنے کی بھی منظوری دی گئی۔