اسلام آباد :بانی پی ٹی آئی عمران خان کو پمز میں طبی معائنہ کے بعد واپس اڈیالہ جیل منتقل کردیاگیا۔
نجی ٹی وی چینل کے مطابق ذرائع کاکہنا ہے کہ بانی کو گزشتہ رات اڈیالہ جیل سے پمز لے جایا گیا ،پمز میں بانی پی ٹی آئی کا معمول کا طبی معائنہ کیاگیا۔ آنکھ کے چوتھے طبی معائنے کے بعد ڈاکٹروں کا کہنا ہے کہ ان کی حالت میں بہتری آ رہی ہے۔
پاکستان انسٹیٹیوٹ آف میڈیکل سائنسز (پمز) کے مطابق عمران خان کو طبی معائنے کے لیے پیر کو لایا گیا تھا۔پمز انتظامیہ نے ایک بیان میں کہا ہے کہ ’اس عمل سے پہلے کیے گئے آنکھ کے سکین میں طبی بہتری ظاہر ہوئی۔ڈاکٹرزکے مطابق یہ سکین آپٹیکل کوہرنس ٹوموگرافی (OCT) تھا، جو ریٹینا اور آنکھ کے اندرونی حصوں کا جائزہ لینے کے لیے استعمال ہوتا ہے۔
سابق وزیر اعظم کی صحت اور جیل کی صورت حال پر ان کی جماعت، حامیوں اور انسانی حقوق کے مبصرین کی جانب سے تشویش کا اظہار کیا جاتا رہا ہے۔پاکستان تحریک انصاف بارہا ان کو دی جانے والی طبی سہولیات اور دورانِ قید علاج تک رسائی پر تشویش ظاہر کر چکی ہے۔
ہسپتال انتظامیہ کا مزید کہنا ہے کہ عمران خان کو چوتھے انٹراویٹریئل انجیکشن کے لیے لایا گیا تھا، جو عام طور پر ریٹینا اور آنکھ کی دیگر بیماریوں کے علاج کے لیے آنکھ میں دوا انجیکٹ کرنے کا طریقہ ہے۔بیان کے مطابق ڈاکٹروں نے عمل سے پہلے خان کا معائنہ کیا اور انہیں طبی طور پر مستحکم پایا۔پمز کے مطابق ’یہ عمل ڈے کیئر سرجری کے طور پر کیا گیا اور اس کے بعد انہیں فالو اپ نگہداشت کی ہدایات کے ساتھ ڈسچارج کر دیا گیا۔‘