اسلام آباد :جڑواں شہروں راولپنڈی اسلام آباد سمیت ملک کے کئی مختلف شہروں میں زلزلے کے جھٹکے محسوس کیے گئے ہیں۔ جھٹکوں کے باعث متأثرہ علاقوں میں خوف و ہراس پھیل گیا۔
تفصیلات کے مطابق زلزلے کے جھٹکے راولپنڈی اسلام آباد کے علاوہ پشاور، سوات اور گردونواح میں بھی محسوس کیے گئے۔ زلزلے کے جھٹکوں کے باعث عوام خوفزدہ ہو کر گھروں اور دفاتر سے باہر نکل آئے۔متعدد علاقوں میں زلزلے کے جھٹکے 15 سے 20سیکنڈ تک مسلسل محسوس کیے گئے۔
پنجاب اور وفاقی دارالحکومت اسلام آباد کے علاوہ خیبر پختونخوا کے مختلف شہروں میں بھی زلزلے کے جھٹکے محسوس کیے گئے جن میں بونیر، ایبٹ آباد، بٹ خیلہ، شانگلہ اور مالاکنڈ شامل ہیں۔ بٹگرام، مانسہرہ اور ہری پور میں بھی زلزلے کے جھٹکے محسوس کیے گئے۔
ہزارہ ڈویژن اور گردونواح میں بھی زلزلے کے جھٹکے محسوس کیے گئے۔ زلزلہ پیما مرکز کا کہنا ہے کہ زلزلے کی شدت 5.7 جبکہ اس کی زیر زمین گہرائی 170 کلومیٹر تھی۔زلزلے کا مرکز افغانستان تاجکستان کا سرحدی علاقہ تھا۔
