کراچی/لاہور: پی ایس ایل 11 کے سب سے بڑے ٹاکرے، لاہور قلندرز بمقابلہ کراچی کنگز کے دوران، سابق اوپنر اور کمنٹیٹر عامر سہیل کے ایک جملے نے کرکٹ شائقین کے جذبات کو بری طرح مجروح کر دیا ہے۔ شہرِ قائد کے بارے میں کیے گئے "نامناسب” تبصرے کے بعد سوشل میڈیا پر ایک نیا طوفان کھڑا ہو گیا ہے، جس نے دونوں شہروں کی پرانی رقابت کو ایک منفی رخ دے دیا ہے۔
میچ کے دوران پاکستان کرکٹ بورڈ (PCB) کی جانب سے ایک خصوصی ویڈیو نشر کی گئی جس میں کراچی اور لاہور کی ثقافت کو خراجِ تحسین پیش کیا گیا تھا۔ تاہم، کمنٹری کرتے ہوئے عامر سہیل نے ایک غیر متوقع اور "چبھتا ہوا” تبصرہ کیا۔ انہوں نے کہا کہ "ڈائریکٹر یہ دکھانا بھول گئے کہ کراچی میں سب سے زیادہ پان کی پچکاری دیکھنے کو ملتی ہے، اس کے بغیر کراچی کی تصویر ادھوری ہے”۔
Mr Amir Sohail former cricketer, chief selector and commentator choosing to mock Karachi city on air during a Khi vs Lhr PSL match being watched globally is disappointing, to say the least.
Right after a positive PCB package celebrating both cities, he chose to bring up “pan… pic.twitter.com/tVg7uWlwC1
— Ammad Yousaf (@AmmadYousaf) April 23, 2026
عامر سہیل کا یہ تبصرہ سامنے آتے ہی سوشل میڈیا پر کراچی کے مداحوں اور شہریوں نے اسے "توہین آمیز” قرار دے دیا۔ صارفین کا کہنا ہے کہ کراچی پاکستان کا معاشی انجن اور ملک کی ریڑھ کی ہڈی ہے، اسے محض ایک منفی سٹیریو ٹائپ (Stereotype) تک محدود کرنا کسی طور پر درست نہیں۔
ایک صارف نے لکھا: "لاہور اور کراچی کا مقابلہ میدان تک رہے تو اچھا ہے، لیکن کمنٹری باکس میں بیٹھ کر ایک پورے شہر کی تضحیک کرنا کسی سابق کھلاڑی کو زیب نہیں دیتا۔”
دوسرے صارف کا کہنا تھا: "پی ایس ایل ایک عالمی برانڈ ہے، وہاں اس طرح کی باتیں ملک کا امیج خراب کرتی ہیں۔”
کرکٹ پنڈتوں کا ماننا ہے کہ لاہور اور کراچی کی رقابت ہمیشہ سے پی ایس ایل کا حسن رہی ہے، لیکن عامر سہیل جیسے سینئر کمنٹیٹر کی جانب سے اس طرح کے "غیر پیشہ ورانہ” جملے اس صحت مند مقابلے کو تلخی میں بدل سکتے ہیں۔ جہاں ایک طرف لاہور کی ثقافت اور زندہ دلی مشہور ہے، وہیں کراچی کی وسعت اور معاشی اہمیت کا مذاق اڑانا شائقین کے نزدیک ایک "گھٹیا شارٹ” ثابت ہوا ہے۔
فی الحال پی سی بی یا عامر سہیل کی جانب سے اس تنقید پر کوئی باضابطہ وضاحت سامنے نہیں آئی ہے، لیکن ٹوئٹر (ایکس) پر #ApologizeToKarachi جیسے ہیش ٹیگز ٹرینڈ کر رہے ہیں۔