لاہور:نواز شریف انسٹیٹیوٹ آف کینسر ٹریٹمنٹ اینڈ ریسرچ کا خواب شرمندہ تعبیر؛ وزیراعلیٰ کی ہر اینٹ اور ہر مشین پر کڑی نگرانی، میرٹ پر تقرریوں کا حکم دیدیا۔
وزیراعلیٰ پنجاب مریم نواز شریف نے کینسر کے مریضوں کے لیے شفا کا سورج طلوع کرنے کے عزم کے ساتھ "نواز شریف انسٹیٹیوٹ آف کینسر ٹریٹمنٹ اینڈ ریسرچ” (NSICTR) کی تعمیر کو اپنی اولین ترجیح بنا لیا ہے۔
ہسپتال کی جلد از جلد تکمیل کے لیے تعمیراتی کام اب تین شفٹوں میں جاری ہے تاکہ اس بڑے منصوبے کو مقررہ وقت سے پہلے مکمل کیا جا سکے۔
وزیراعلیٰ مریم نواز شریف نے ہسپتال کے مختلف شعبوں کا ڈیجیٹل ٹور کیا اور تعمیراتی پیش رفت کا تفصیلی جائزہ لیا۔ انہوں نے مرکزی داخلی ہال، ریڈیالوجی، میموگرافی سوئٹ، سی ٹی سکین روم، ریڈیالوجی تھراپی، ٹریٹمنٹ پلاننگ روم، سیمولیٹر اور مریضوں کے لیے سٹیٹ آف دی آرٹ سیٹنگ ایریا کا باریکی سے معائنہ کیا۔ اس موقع پر انہوں نے اے ایچ یو (AHU) روم اور دیگر تکنیکی حصوں کے معیار کو بھی پرکھا۔
صرف عمارت کی تعمیر ہی نہیں، بلکہ ہسپتال کو بہترین طبی عملے سے لیس کرنا بھی وزیراعلیٰ کا ہدف ہے۔ اس حوالے سے اہم پیشرفت جاری ہے۔انسٹیٹیوٹ کے لیے 219 آسامیوں کا اشتہار پہلے ہی دیا جا چکا ہے، جن میں سے 32 امیدواروں کا انتخاب بھی عمل میں آ گیا ہے۔
ہسپتال میں مزید 415 آسامیوں کی منظوری دی گئی ہے، جن کے لیے اشتہار اگلے ہفتے جاری کر دیا جائے گا۔
وزیراعلیٰ نے سختی سے ہدایت کی ہے کہ ہسپتال کے ڈین، ڈائریکٹر اور دیگر اہم عہدوں پر صرف بہترین اور مستند پروفیشنلز کو میرٹ پر تعینات کیا جائے۔
وزیراعلیٰ مریم نواز شریف کا ماننا ہے کہ کینسر جیسے موذی مرض کا علاج اب عام آدمی کی پہنچ میں ہونا چاہیے۔ انہوں نے اس عزم کا اظہار کیا کہ یہ انسٹیٹیوٹ نہ صرف جدید ترین طبی سہولیات فراہم کرے گا بلکہ مریضوں کو ایک باعزت اور آرام دہ ماحول میں علاج کی سہولت بھی ملے گی۔