تحریر:اسد مرزا
جہاں لفظ بے نقاب ہوں۔۔۔ وہیں سے سچ کا آغاز ہوتاہے
انسانیت کی خدمت کا حلف اٹھانے والے جب اپنی حدود پار کر جائیں تو سوال صرف قانون کا نہیں، ضمیر کا بھی بن جاتا ہے۔ لیڈی ولنگڈن ہسپتال لاہور میں ایک مریضہ کے سی سیکشن کے دوران ویڈیو بنانے کے سنگین واقعے نے پورے طبی نظام کو ہلا کر رکھ دیا ہے۔
حکومت پنجاب کے اسپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ نے فوری اور سخت کارروائی کرتے ہوئے 4 گائنی ڈاکٹرز کو معطل کر دیا ہے۔ معطل کیے جانے والوں میں ڈاکٹر طیبہ فاطمہ طور،ڈاکٹر ماہم امین ڈاکٹر زینب طاہر ڈاکٹر عائشہ افضل شامل ہیں، جن پر پیشہ ورانہ ضابطہ اخلاق کی سنگین خلاف ورزی کا الزام ہے۔
حکام کے مطابق سوشل میڈیا پر گردش کرنے والی ویڈیو میں مبینہ طور پر آپریشن تھیٹر جیسے حساس مقام پر غیر ذمہ دارانہ رویہ اختیار کیا گیا، جو نہ صرف مریضہ کی پرائیویسی کی کھلی خلاف ورزی ہے بلکہ طبی پیشے کے تقدس پر بھی ایک بڑا سوالیہ نشان ہے۔
مزید برآں، گائنی وارڈ کی سربراہ پروفیسر ڈاکٹر عظمیٰ حسین کو بھی شوکاز نوٹس جاری کرتے ہوئے تین دن کے اندر وضاحت طلب کر لی گئی ہے۔حکام کا کہنا ہے کہ اگر تسلی بخش جواب نہ دیا گیا تو مزید سخت کارروائی عمل میں لائی جائے گی۔ یہ واقعہ ایک تلخ حقیقت کو بے نقاب کرتا ہے کہ جہاں ڈاکٹر کو “مسیحا” کہا جاتا ہے، وہیں چند غیر ذمہ دار رویے اس مقدس پیشے کو بدنام کر دیتے ہیں۔ مریضہ، جو زندگی اور موت کے درمیان ایک نازک مرحلے سے گزر رہی ہوتی ہے، اس کی عزت، رازداری اور تحفظ سب سے پہلی ترجیح ہونی چاہیے