"فتنہ الخوارج اور فتنہ ہندوستان کے خلاف آپریشن بھرپور طاقت سے جاری رہے گا”: آئی جی عبدالکریم کا دو ٹوک اعلان

بھکر : (رپورٹ ملک سمیع اللہ )انسپکٹر جنرل پولیس پنجاب عبدالکریم نے ڈی ایچ کیو ہسپتال بھکر کا دورہ کیا، جہاں انہوں نے داجل چیک پوسٹ پر ہونے والے حالیہ خودکش حملے میں زخمی ہونے والے پولیو ورکر کی عیادت کی۔ اس موقع پر ایڈیشنل آئی جی سی ٹی ڈی وسیم احمد سیال اور ڈی پی او بھکرشہزاد رفیق اعوان سمیت دیگر اعلیٰ پولیس افسران بھی ان کے ہمراہ تھے۔
آئی جی پنجاب نے زیرِ علاج پولیو ورکر کی خیریت دریافت کی اور ان کی جلد صحت یابی کے لیے دعا کی۔ انہوں نے ہسپتال انتظامیہ کو زخمیوں کو بہترین طبی سہولیات فراہم کرنے کی ہدایت کی۔ حملے میں زخمی ہونے والے ایک پولیس اہلکار کو بہتر علاج کے لیے ملتان منتقل کر دیا گیا ہے، جہاں ان کی حالت خطرے سے باہر بتائی جاتی ہے۔
داجل چیک پوسٹ حملے کی تفصیلات بتاتے ہوئے آئی جی پنجاب نے کہا کہ ہمارے دو بہادر جوانوں نے جامِ شہادت نوش کر کے خودکش بمبار کو چیک پوسٹ کے اندر داخل ہونے سے روکا اور ایک بڑی تباہی سے بچا لیا۔ انہوں نے کہا:
"شہید اہلکاروں نے اپنی جانیں قربان کر کے فرض شناسی کی اعلیٰ مثال قائم کی ہے، ان کا خون رائیگاں نہیں جانے دیا جائے گا۔”
آئی جی پنجاب عبدالکریم نے میڈیا سے گفتگو کرتے ہوئے واضح کیا کہ پنجاب پولیس دہشت گردوں کے ناپاک عزائم کو کبھی کامیاب نہیں ہونے دے گی۔ انہوں نے کہا کہ ‘فتنہ الہندوستان’ اور ‘فتنہ الخوارج’ کے خلاف پولیس کا آپریشن پوری قوت اور شدت کے ساتھ جاری رہے گا۔ ریاست دشمن عناصر جہاں بھی ہوں گے، انہیں منطقی انجام تک پہنچایا جائے گا۔