اسلام آباد :اڈیالہ جیل میں قید بانی پاکستان تحریک انصاف عمران خان کی بیٹوں قاسم اور سلیمان سے فون پر بات کروا دی گئی۔
جیل ذرائع کے مطابق عمران خان اور بیٹوں کی ٹیلیفون پر گفتگو ایک گھنٹے سے زائد تک جا رہی، عمران خان نے قاسم اور سلیمان کو اپنی صحت کی صورتحال سےآگاہ کیا۔ سپریم کورٹ نے حکومت کو بانی پی ٹی آئی کا طبی معائنہ اور بچوں سے بات کرانے کا حکم دیا تھا، جیل میں مناسب جگہ اور سہولتوں پر عدالت نے اطیمنان کا اظہار کیا۔
سپریم کورٹ نے بانی پی ٹی کی جیل میں حالت اور سہولیات کے معاملے کی سماعت میں فرینڈ آف کورٹ سلمان صفدر نے رپورٹ کی سفارشات پڑھ کر سنا دیں۔ سلمان صفدر نے کہا کہ بانی پی ٹی آئی کی صحت سے متعلق فوری مداخلت کی ضرورت ہے۔
فرینڈ آف کورٹ سلمان صفدر نے استدعا کی کہ طبی معائنہ کسی فیملی ممبر کی موجودگی میں کرایا جائے ۔ عدالت نے فیملی ممبر کی موجودگی کو کورٹ آرڈر کا حصہ بنانے کی استدعا مسترد کردی ۔