کیچ: فرنٹیئر کور بلوچستان (ساؤتھ) کے زیرِ اہتمام ضلع کیچ میں “معاشرتی ترقی میں بلوچ خواتین کا کردار” کے عنوان سے ایک اہم سیمینار منعقد ہوا۔ سیمینار کا مقصد بلوچستان کی خواتین کی سماجی و معاشرتی اہمیت اور علاقائی ترقی میں ان کے مؤثر کردار کو اجاگر کرنا تھا۔
سیمینار میں انسپکٹر جنرل ایف سی بلوچستان (ساؤتھ)، ارکانِ اسمبلی، مقامی سیاستدان، سول و عسکری عمائدین، اساتذہ، ڈاکٹرز اور بڑی تعداد میں خواتین نے شرکت کی۔پینل ممبران نے خطاب کرتے ہوئے کہا کہ بلوچ خواتین نے ہمیشہ معاشرتی ترقی میں اہم کردار ادا کیا ہے۔ انہوں نے کہا کہ بلوچ خواتین باہمت، باحوصلہ اور ہر میدان میں مردوں کے شانہ بشانہ کام کر رہی ہیں۔
مقررین کے مطابق، تعلیم، طب، بیوروکریسی، سیکیورٹی، سیاست اور انتظامی امور میں بلوچ خواتین نے اپنی قابلیت، عزم اور محنت سے خود کو منوایا ہے۔سیمینار کے دوران سوال و جواب اور انٹریکٹو سیشن میں شرکاء نے بلوچ خواتین کے ابھرتے ہوئے کردار کو باعثِ فخر قرار دیا۔
سیمینار سے خطاب کرتے ہوئے آئی جی ایف سی بلوچستان (ساؤتھ) نے کہا کہ معاشرتی ترقی ایک منظم ارتقائی عمل ہے، جس میں بلوچ خواتین کا کردار نہایت اہم ہے۔ آج بلوچ خواتین اپنی محنت، عزم اور صلاحیتوں کے باعث قومی ترقی میں نمایاں کردار ادا کر رہی ہیں۔
سیمینار کے اختتام پر شرکاء نے اس بات پر زور دیا کہ بلوچ خواتین کو تعلیم، روزگار اور قیادت کے میدانوں میں مساوی مواقع فراہم کیے جائیں، کیونکہ وہ صوبے کی ترقی، استحکام اور خوشحالی میں کلیدی کردار ادا کرنے کی صلاحیت رکھتی ہیں۔