لاہور :وزیر اطلاعات پنجاب عظمی بخاری نے پیپلز پارٹی کے رہنماؤں کی پریس کانفرنس پر ردعمل ظاہر کرتے ہوئے کہا ہے کہ سیاسی بیروزگاری کا رونا رونے کےلیے پی ٹی آئی کافی تھی،پیپلزپارٹی کو کیا ضرورت پڑگئی؟پیپلز پارٹی اور اس کے ہارے ہوئے لوگوں کو سندھ کے لوگوں کی فکر کرنی چاہیے:۔2022 کے سندھ سے سیلاب متاثرین آج بھی امداد کے منتظر ہیں۔
اپنے ایک بیان میں انہوں نے پیپلز پارٹی کی آج ہونے والی پریس کانفرنس کے حوالے سے کہا ہے کہ ہم سیلاب متاثرین کی مدد میں مصروف ہیں اس لیے اتحادی سمجھ کر برداشت کررہے ہیں لیکن اتحادی ہونے کا یہ مطلب نہیں اب آپکے جعلی فلسفے اور ناکام تھیوریاں سنتے جائیں۔
انہوں نے کہا کہ منظور چوہدری اور حسن مرتضیٰ اپنے فلسفے اور دکھ بلاول بھٹو اور مراد علی شاہ کو سنائیں ،پنجاب ملکی تاریخ کے سب سے بڑے سلاب کا سامنا کر رہا ہےمریم نواز اور پنجاب کی انتظامیہ دن رات سلاب سے متاثرہ لوگوں کو ریلیف دینے میں مصروف ہیں اور الحمد للہ پنجاب حکومت سیلاب متاثرین کی ہر قسم کی مدد اپنے وسائل سے کر رہی ہے۔
ان کا کہنا تھا کہ سندھ میں ابھی سیلاب سے کوئی جانی اور مالی نقصان نہیں ہوا۔اس کے باوجود پیپلز پارٹی وفاق کو بیرون ملک سے امداد مانگنے پر فورس کررہی ہے مریم نواز نے تمام وسائل اور حکومتی مشینری کا رخ سیلاب متاثرین کی طرف موڑ دیا ہے وزیراعلی مریم نواز نے وفاق سمیت کسی بھی تنظیم کی طرف مدد کےلئے نہیں دیکھا۔