خیبر پختونخوا کے ضلع لوئر دیر کے علاقے میدان گل میں دہشت گردوں نے پولیس چوکی پر اچانک حملہ کر دیا، جس میں ایلیٹ فورس کا ایک اہلکار شدید زخمی ہو گیا۔ پولیس کے مطابق حملہ ہینڈ گرینیڈ اور بھاری ہتھیاروں سے کیا گیا، جس کے نتیجے میں زخمی اہلکار کو فوری طور پر ڈسٹرکٹ ہیڈ کوارٹر اسپتال تیمرگرہ منتقل کیا گیا، جہاں اس کی حالت تشویشناک بتائی جا رہی ہے۔
واقعے کے فوراً بعد پولیس نے بھرپور جوابی کارروائی کی، جس کے باعث حملہ آور موقع سے فرار ہو گئے۔ پولیس کی مزید نفری جائے وقوع پر پہنچ گئی اور علاقے میں سرچ آپریشن شروع کر دیا گیا ہے تاکہ دہشت گردوں کو گرفتار کیا جا سکے۔
حکام کے مطابق علاقے میں سکیورٹی مزید سخت کر دی گئی ہے اور عوام سے اپیل کی گئی ہے کہ کسی بھی مشکوک سرگرمی کی اطلاع فوراً پولیس کو دی جائے۔