راولپنڈی :آرمی چیف فیلڈ مارشل عاصم منیر نے چین کی پیپلز لبریشن آرمی کے یوم تاسیس کے موقع پر کہا کہ پاکستان چین سٹریٹیجک تعلقات باہمی اعتماد، غیر متزلزل حمایت اور مشترکہ عزم کی مثال ہیں۔
جمعے کو فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق پیپلز لبریشن آرمی کے قیام کی 98ویں سالگرہ کی تقریب راولپنڈی میں پاکستان فوج کے ہیڈکوارٹرز میں منعقد کی گئی۔تقریب میں چین کے سفیر جیانگ زیڈونگ، دفاعی اتاشی میجر جنرل وانگ ژونگ، سفارتخانے کے حکام اور افواجِ پاکستان کے اعلیٰ افسران نے بھی شرکت کی۔
فیلڈ مارشل عاصم منیر نے چینی مہمانوں کا پرتپاک استقبال کیا اور پی ایل اے کے 98 ویں یوم تاسیس کے موقع پر مبارکباد دی۔انہوں نے چین کے دفاع، سلامتی اور قومی تعمیر میں پی ایل اے کے اہم کردار کو سراہا۔تقریب سے خطاب میں آرمی چیف فیلڈ مارشل عاصم منیر نے کہا کہ بدلتی ہوئی سٹریٹیجک صورتحال کے باوجود دونوں ممالک کے درمیان دوستی مستحکم اور غیر متزلزل ہے۔
پاکستان چین تعلقات کی مضبوطی اور سٹریٹیجک اہمیت پر زور دیتے ہوئے آرمی چیف نے کہا کہ دونوں ممالک کے تعلقات منفرد اور آزمودہ ہیں جو بدلتے ہوئے علاقائی اور عالمی چیلنجز کے باوجود مضبوط ہیں۔ اپنے خطاب کے اختتام پر فیلڈ مارشل سید عاصم منیر نے اس بات کا اعادہ کیا کہ پاکستان فوج اور پی ایل اے کے درمیان پائیدار شراکت داری علاقائی استحکام کو فروغ دینے اور مشترکہ سٹریٹجک مفادات کے تحفظ میں اہم کردار ادا کرتی رہے گی۔
چینی سفیر نے تقریب سے خطاب میں پی ایل اے کے یوم تاسیس کی میزبانی پر آرمی چیف کا شکریہ ادا کیا۔سفیر جیانگ زیڈونگ نے دہشت گردی کے خلاف جنگ میں پاکستان کی مسلح افواج کے ثابت قدم ہونے کا اعتراف کیا اور پاکستان کے ساتھ سٹریٹیجک شراکت داری کے لیے چین کی غیر متزلزل حمایت اور عزم کا اعادہ کیا۔
