واشنگٹن ڈی سی :امریکی صدر ڈونلڈ ٹرمپ نے اسرائیلی وزیراعظم بنیامن نیتن یاہو سے ٹیلی فون پر رابطہ کر کے غزہ امن منصوبے پر پیشرفت یقینی بنانے پر زور دیا ہے۔
امریکی نیوز ویب سائٹ ‘ایگزیوس’ کے مطابق اس اہم گفتگو میں امریکی عہدیدار مارکو روبیو، جیرڈ کشنر اور سٹیو وٹکوف بھی شریک تھے، جہاں ٹرمپ انتظامیہ نے واضح کیا کہ اسرائیل میں کوئی بھی حکومت قائم ہو، امریکہ غزہ منصوبے کو آگے بڑھانے کا خواہاں ہے۔ رابطے کے دوران دونوں رہنماؤں نے ایران کی مجموعی صورتِ حال پر بھی تبادلہ خیال کیا۔ اس ٹیلی فونک رابطے کے فوری بعد سابق برطانوی وزیراعظم ٹونی بلیئر نے بھی اسرائیل کا دورہ کر کے نیتن یاہو اور ان کے سیاسی حریف آئزن کوٹ سے ملاقاتیں کیں اور امن منصوبے پر عملدرآمد کے لیے اسرائیلی تعاون کا مطالبہ کیا۔ واضح رہے کہ اسرائیلی انتخابات اور اندرونی سیاسی تحفظات کی بنا پر حماس کو غیر مسلح کرنے اور اسرائیلی فوج کے انخلا پر مشتمل یہ اہم منصوبہ کئی ماہ سے تعطل کا شکار تھا۔
