سیالکوٹ (سلیم احمد اعوان شیخو):
تھانہ کوٹلی لوہاراں کے علاقہ کھروٹہ سیداں میں نشے کے عادی نوجوان کی فائرنگ سے ایک پولیس کانسٹیبل شدید زخمی ہو گیا، جبکہ پولیس نے بروقت کارروائی کرتے ہوئے ملزم کو گرفتار کر لیا ہے۔تفصیلات کے مطابق کھروٹہ سیداں کے رہائشی والدین اپنے نشے کے عادی بیٹے عاقب کی آئے روز کی گھریلو تشدد کی کارروائیوں سے تنگ آ چکے تھے، جو روزانہ اپنے والد اور والدہ کو تشدد کا نشانہ بناتا تھا۔ والدین کی اطلاع پر تھانہ کوٹلی لوہاراں کی پولیس ٹیم کارروائی کے لیے ملزم عاقب کے گھر پہنچی۔پولیس کے گھر پہنچنے پر ملزم عاقب نے طیش میں آ کر پولیس ٹیم پر سیدھی فائرنگ شروع کر دی، جس کے نتیجے میں ایک گولی پولیس کانسٹیبل مصطفیٰ کو لگی اور وہ شدید زخمی ہو گئے۔زخمی کانسٹیبل مصطفیٰ کو فوراً طبعی امداد کے لیے گورنمنٹ علامہ اقبال میموریل ٹیچنگ ہسپتال سیالکوٹ منتقل کر دیا گیا ہے۔ دوسری جانب پولیس نے فوری جوابی کارروائی اور حکمت عملی کے تحت فائرنگ کرنے والے ملزم عاقب کو گرفتار کر کے اس کے خلاف مقدمہ درج کر لیا ہے اور مزید تفتیش جاری ہے۔