دلخراش حادثہ ویشالی میں رام پور شیام چند گاؤں کے قریب پیش آیا، جہاں قریبی گاؤں میں دعوت میں شرکت کے بعد واپس آنے والی ایک کشتی دریائے گنگا میں الٹ گئی۔ حالیہ بارشوں اور معاون دریا ‘گنڈک’ میں طغیانی کے باعث دریا میں پانی کا بہاؤ تیز تھا۔حادثے کے بعد کچھ افراد تیر کر باہر نکلنے میں کامیاب ہو گئے، جب کہ زیادہ تر افراد ڈوب گئے۔ جاں بحق ہونے والوں میں زیادہ تر 15 سال سے کم عمر کے بچے شامل ہیں۔ اطلاع ملتے ہی ویشالی کی ڈسٹرکٹ مجسٹریٹ ورشا سنگھ اور سپرنٹنڈنٹ آف پولیس شبھانک مشرا موقع پر پہنچ گئے اور بچاؤ و امدادی کارروائیوں کی خود نگرانی کی۔ریسکیو کیے گئے چند زخمیوں کی حالت تشویشناک بتائی جا رہی ہے جنہیں فوری طور پر ایمبولینس کے ذریعے ہسپتال منتقل کر دیا گیا ہے۔ اس افسوسناک واقعے کے بعد علاقے میں کہرام مچ گیا اور بڑی تعداد میں مقامی لوگ دریائے گنگا کے کنارے جمع ہو گئے۔
