خوشاب (بے نقاب نیوز راجہ نورالہی عاطف سے)
جوہر آباد لائیو سٹاک کمپلیکس، زمان کالونی میں جانوروں کی بیماریوں کی بروقت تشخیص کے لیے جدید موبائل ویٹرنری لیبارٹری اور تشخیصی مرکز کا باقاعدہ افتتاح کر دیا گیا ہے۔ افتتاحی تقریب کے مہمانِ خصوصی ایم پی اے ملک محمد آصف بھاء اعوان تھے۔وزیر اعلیٰ پنجاب مریم نواز شریف کے لائیو سٹاک کی ترقی اور مویشی پال حضرات کو جدید طبی سہولیات کی فراہمی کے خصوصی اقدامات کے تحت، صوبائی وزیر لائیو سٹاک سید عاشق حسین کرمانی کی قیادت اور سیکرٹری لائیو سٹاک احمد عزیز تارڑ کی زیر نگرانی محکمہ لائیو سٹاک پنجاب کو جدید تشخیصی سہولیات سے آراستہ کیا جا رہا ہے۔ اسی سلسلے میں ضلع خوشاب میں یہ جدید موبائل ویٹرنری لیبارٹری قائم کی گئی ہے۔تقریب کے دوران ڈویژنل ڈیزیز انویسٹی گیشن اینڈ کنٹرول آفیسر ڈاکٹر رائے شفقت علی خان اور ایڈیشنل ڈائریکٹر لائیو سٹاک ضلع خوشاب ڈاکٹر تنویر اشرف کلیار نے مہمانِ خصوصی کا استقبال کیا۔ ڈاکٹر رائے شفقت علی خان نے لیبارٹری کے اغراض و مقاصد پر روشنی ڈالی، جبکہ ڈاکٹر تنویر اشرف کلیار نے ضلع خوشاب میں محکمہ لائیو سٹاک کی کارکردگی پر تفصیلی بریفنگ دی۔افتتاح کے بعد ایم پی اے ملک محمد آصف بھاء اعوان نے لیبارٹری کے تمام شعبہ جات کا معائنہ کیا اور مختلف ٹیسٹوں کے طریقۂ کار کا عملی مشاہدہ کیا۔ انہوں نے موبائل ویٹرنری لیبارٹری میں نصب مائیکروسکوپ کے ذریعے خون کے نمونوں کا معائنہ کیا اور سی بی سی (CBC) مشین پر خون کے نتائج بھی چیک کیے۔ انہوں نے ان جدید سہولیات کو جانوروں کی بیماریوں کی بروقت اور مؤثر تشخیص کے لیے اہم پیش رفت قرار دیا۔اس موقع پر ایم پی اے ملک محمد آصف بھاء اعوان نے وزیر اعلیٰ پنجاب کے لائیو سٹاک کی ترقی کے اقدامات کو سراہتے ہوئے کہا کہ ایسی سہولیات سے جانوروں کی بیماریوں کی بروقت تشخیص، مؤثر علاج اور بیماریوں پر قابو پانے میں مدد ملے گی، جس سے مویشی پال حضرات کو بھرپور فائدہ پہنچے گا۔تقریب میں ڈپٹی ڈائریکٹرز لائیو سٹاک ڈاکٹر وسیم عباس، ڈاکٹر محمد عمران اور ڈاکٹر عاطف کامران شاہ، اے ڈی آئی او خوشاب ڈاکٹر نصیر شاہ، محکمہ لائیو سٹاک کے افسران، پیرا ویٹس اور فارمرز کی بڑی تعداد نے شرکت کی۔ اس موقع پر ملک رضوان بھا اور ملک بلال بھا بھی موجود تھے۔